Buxoro viloyati IIB matbuot xizmati joriy yilning 6 oyida viloyat ichki ishlar idoralari xodimlari voyaga yetmaganlar tomonidan sodir etilgan jinoyatlar o‘tgan 2016-yilning shu davriga nisbatan 27,6 foizga, ya’ni 8 taga (29—37) ko‘p ekanligini ma’lum qildi.
Voyaga yetmaganlar tomonidan sodir etilgan jinoyatlarni turlari bo‘yicha tavsiflaganda, 1 ta og‘ir tan jarohati yetkazish, 2 ta talonchilik, 3 ta bezorilik va 31 ta o‘g‘rilik jinoyatlari qayd qilingan.
Jinoyatlarni sodir etishda ishtirok etgan voyaga yetmaganlar soni ham viloyatda keskin 9 taga ko‘payib, 38 nafarni tashkil qilgan, bulardan 11 nafari maktab, 26 nafari kasb-hunar kollej o‘quvchilaridir. Achinarlisi, 4 nafar qiz bolalar tomonidan ham jinoyat sodir qilinganligi kuzatilgan. Jinoyat sodir qilgan 5 nafar voyaga yetmaganlarning ota-onasi ajrashganligi yoki ulardan biri vafot etganligi sababli yolg‘iz ona yoki yolg‘iz ota qaramog‘ida tarbiyalanayotganlardir. Shuningdek, 4 nafari ota-onasi uzoq muddatga ketganligi yoki ajrashib boshqa oila qurganligi tufayli qarindoshlari qarmog‘ida bo‘lgan o‘smirlarni tashkil qilgan. 2 nafari mehribonlik uyida tarbiyalanib, hozirgi vaqtda Buxoro neft va gaz kollejida tahsil olib, shu kollej yotoqxonasida yashayotgan chin yetimlar tomonidan ham o‘zlari yashayotgan yotoqxonada telefon o‘g‘riligi jinoyatini sodir qilganlar.
O‘z navbatida, boshqa viloyatlardan kelib, qarovsiz va nazoratsiz yurgan voyaga yetmaganlarni o‘z vaqtida aniqlanmayotganligi oqibatida, Sirdaryo viloyati Sirdaryo tumanida yashovchi, Sirdaryo tibbiyot kolleji o‘quvchisi, 2000-yilda tug‘ilgan Abdurahmonov Farruh ota-onasi bilan o‘zaro kelishmasdan, uyidan o‘zboshimchalik bilan Buxoro viloyatiga qochib kelib, G‘ijduvon tumanida ijarada yashab, puli qolmaganligi uchun Buxoro shahar hududida fuqarolarga tegishli savdo do‘konlaridan 2 ta o‘g‘rilik jinoyatlari sodir qilgan.
Jinoyatlarda ishtirok etgan 4 nafar voyaga yetmaganning ota-onalaridan biri farzandini ona yoki ota tarbiyasida qoldirib, o‘zi ishlash maqsadida yashash manzilidan uzoq muddatga chiqib ketgan. Bundan tashqari, 6 nafari iqtisodiy jihatdan og‘ir ahvolda bo‘lgan oilalarda tarbiyalanyotgan o‘smirlarni tashkil etgan.
Jinoyatlarning kelib chiqish sabablari bo‘yicha tahlil qilinganda, 4 tasi (bezorilik va og‘ir tan jarohati yetkazish jinoyatlari) o‘zaro kelishmovchilik tufayli, 1 tasi tanishidan pullarini qaytarib ololmaganli sababli, 32 tasi tengqurlaridan kam bo‘lmaslik, zamonaviy texnika buyumlariga egalik qilish, oilasidagi muhtojlik va tekin boylik orttirish maqsadida sodir etilganligi aniqlandi.
Izoh (0)