Абдулазиз Комилов Жаҳон банкининг Марказий Осиё бўйича минтақавий директори Лилия Бурунчукни қабул қилди

Ўзбекистон Республикаси ташқи ишлар вазири Абдулазиз Комилов икки томонлама музокаралар ўтказиш учун нуфузли делегация раҳбари сифатида Тошкентга келган Жаҳон банкининг Марказий Осиё бўйича минтақавий директори Лилия Бурунчукни қабул қилди. Бу ҳақда вазирлик матбуот хизмати маълум қилди.

Лилия Бурунчук шу йилнинг ўзида тўртинчи марта Ўзбекистонга ташриф буюрмоқда. Аввалроқ Жаҳон банки делегацияси ижтимоий-иқтисодий вазият билан танишиш мақсадида Оролбўйига ташриф буюрган эди.

ТИВда бўлиб ўтган суҳбат чоғида Ўзбекистон ва Жаҳон банки гуруҳи ўртасидаги шерикчилик истиқболлари муҳокама қилинди.

Мулоқот давомида Ҳаракатлар стратегиясини амалга ошириш доирасидаги ҳамкорлик масалаларига алоҳида эътибор қаратилди.

Учрашувда томонларни қизиқтирган бошқа масалалар юзасидан ҳам фикр алмашилди.