Ўзбекистонда Истеъмол бозорида нархларни барқарорлаштиришга кўмаклашиш фонди ташкил этилди. Бу ҳақда UzDaily хабар бермоқда.
Янги фонд Ўзбекистон Президентининг «Республика аҳолисини ижтимоий аҳамиятга молик озиқ-овқат товарлари билан ишончли таъминлаш бўйича кечиктириб бўлмайдиган чора-тадбирлар тўғрисида»ги қарорига мувофиқ ташкил этилди.
Фонд юридик шахс мақомисиз ташкил этилмоқда. Қарорга мувофиқ, молия вазирлиги унга 100 миллион доллар миқдоридаги маблағ тақдим этади.
Ушбу маблағ асосий озиқ-овқат маҳсулотларига бўлган талаб ва таклифнинг мавсумий ва бошқа кескин ўзгаришларини бартараф этишга сарфланади.
Биринчи навбатда, гўшт, ўсимлик ва ҳайвон ёғи, донли экинлар, ун, картошка, сабзи, пиёз, шунингдек, бошқ ижтимоий аҳамиятга молик товарларнинг нархларини барқарорлаштиришга қаратилади.
Ижтимоий аҳамиятга молик асосий товарлар нархларини мониторинг қилиш бўйича Республика комиссияси фонд маблағларини тасарруф қилади. Комиссияга бош вазир Абдулла Арипов раҳбарлик қилади.
Изоҳ (0)