Delta Air Lines авиакомпаниясининг Сиэтлдан Пекинга учаётган самолёти бортида 23 ёшли Жозеф Дэниел Хадек учувчи кабинасига киришга уринди. Шу сабабдан экипаж командири самолёт чиққан аэропортга қайтишга қарор қилди, деб хабар беради «MK.ru».
Аммо жанжалкаш бу билан тинчланмади ва фавқулодда чиқиш эшигини очишга уринди. Юзага келган талашда Хадек борт кузатувчисининг юзига урди, экипажга ёрдамга келган йўловчининг эса бошига шиша билан туширди.
Шунда жабрланган борт кузатувчиси иккита вино шишасини олиб, Хадекнинг бошига урди, бунда шишалардан бири синиб кетди.
Шундан сўнг Хадекни боғлаб қўйишнинг имкони бўлди, лекин қонунбузар шундан кейин ҳам бутун йўл давомида қичқириб, сўкиниб кетди.
Самолёт қўнганидан сўнг Хадек тиббий ёрдамдан бош тортди ва полицияга топширилди. Борт кузатувчиси ва жабрланган йўловчи эса шифохонага етказилди.
Энди жанжалкаш йўловчи 20 йилгача қамалиши ёки 250 минг доллар жарима тўлаши мумкин.