Мамлакат раҳбарлари қандай автомобилларда ҳаракатланади? (фото)

Кўплаб мамлакат раҳбарлари ўз юртида ишлаб чиқарилган автомобилларни танлашга ҳаракат қилади. Forbes нашри дунёга машҳур етакчилар қандай автомобилда ҳаракатланиши ҳақида маълумот тўплаб тақдим этди.

Путин учун «Кортеж»

«Кортеж» лойиҳаси доирасида президент ва юқори мансабли амалдорлар учун автомобиллар ишлаб чиқариш амалга оширилмоқда: седан, минивен ва йўлтанламасларни оддий истеъмолчилар ҳам сотиб олиши мумкин бўлади.

Аввалроқ, тайёр автомобиллар синов ва тестлар учун махсус мақсадли гаражга топширилган эди. Автомобиллар расман 2018 йилда бўлиб ўтадиган сайловлардан сўнг, инаугурацияда тақдим этилади. Режаларга кўра узоқ йиллардан сўнг Россия президенти ўз юртида ишлаб чиқарилган автомобилда ҳаракатланадиган бўлади.

Автомобилларни серияли ишлаб чиқариш эса 2018—2019 йилларга мўлжалланган. VIP-автомобиллар учун тўрт турдаги моторлар тақдим этилади. Уларнинг барчаси Россияда ишлаб чиқарилган бўлади. Улар ичида энг кучлиси ишчи ҳажми 6—7 литр бўлган V12 двигатели, унинг қуввати 800—859 от кучига эга бўлиши кутилмоқда.

Трампнинг «Йиртқич»и

General Motors компанияси АҚШ президенти учун махсус Cadillac автомобилини тайёрлади. Президент учун мўлжалланган зирҳли лимузин эшикларининг қалинлиги 20 сантиметр бўлиб, «Йиртқич» номини олган. Автоэкспертларнинг баҳолашича, у дунёдаги энг хавфсиз автомобиль бўлиши мумкин. Унинг оғирлиги 8 тонна бўлиб, эшикларининг оғирлиги Boeing-757 самолётини эшиклари оғирлигига тенг.

2017 йилнинг май ойида Трампнинг автомобили жуда энли бўлганлиги сабаб Брюсселдаги қироллик резиденсиясининг дарвозасига сиғмаган.

Макрон учун Citroen

Cитроён компанияси Франция президенти Эммануэль Макрон учун DS7 Crossback кроссоверини инаугурацияга қадар тақдим этди. Макрон 2017 йил 14 май куни бўлиб ўтган инаугурация маросимининг асосий қисмида айнан шу автомобилда юрди. Автомобиль юқори қисмига Макрон учун махсус очилувчи том қўйилган бўлиб, бу орқали президент французларга салом йўллаши мумкин.

Канцлер учун Kanzler

Германия канцлери Ангела Меркель кўпинча Audi A8 L Security W12’нинг махсус Kanzler вариантида юради. Бу автомобилни Меркелнинг ўзи танлаган. Унинг кўплаб вазирлари эса зирҳли BMW’да юришни маъқул кўради. Шунингдек, канцлернинг гаражида Sonderklasse классидаги Mercedes-Benz S600L ҳам бор.

Қиролича учун Bentley

Биринчи серияли Bentley Bentayga 2015 йилда Буюк Британия қироличаси Елизавета II учун рўйхатга олинган. Қиролича ўзининг автомобилларга бўлган муҳаббати билан машҳур. У Range Rover’нинг турли моделларида ва ҳатто қироллик оиласига хос бўлмаган Land Rover Defender’дан ҳам фойдаланган.

Си Цзиньпин учун L5

Хитой етакчиси Си Цзиньпин Hongqi CA770 моделида юришни маъқул кўради. L5 ҳозирда энг қиммат Хитой автомобили эканлиги ва исталган сотиб олиши мумкинлиги билан машҳур. Унинг нархи беш миллион (760 000 доллар). Седан 2013 йилда Шанхайдаги автосалонда тақдим этилган бўлиб, уни фақат Хитой ҳудудида сотиб олиш мумкин.

Ким Чен Ин учун Mercedes

Шимолий Корея етакчиси қандай автомобилдан фойдаланишини ўта махфий сақланади. Бироқ 2015 йилда Жанубий Корея ОАВлари КХДР етакчиси учун Германияда махсус зирҳли Mercedes йиғилиб Шимолий Кореяга етказилгани ҳақида маълумотларини эълон қилганди.