Шавкат Мирзиёев Фарғона шаҳридаги кичик саноат зонасида бўлди

Шавкат Мирзиёев Фарғона механика заводида кичик саноат зонаси ташкил этиш, янги маҳсулотлар ишлаб чиқариш лойиҳалари билан танишди. Бу ҳақда ЎзА хабар бермоқда.

Фарғона механика заводининг умумий майдони 36,1 гектар, шундан ишлаб чиқариш майдони 9,9 гектар. Ҳозирги кунда корхонада 36 турдаги саноат маҳсулоти ва 31 турдаги халқ истеъмоли товари ишлаб чиқарилмоқда, 330 ишчи меҳнат қилмоқда.

Корхонанинг бўш турган бино ва иншоотларини тадбиркорларга имтиёзли шартларда бериш, ички ва ташқи бозорда рақобатбардош маҳсулотлар тайёрлашни кенгайтириш ва янги иш ўринлари яратиш мақсадида бу ерда кичик саноат зонаси ташкил этилмоқда.

Саноат зонасида йилига 300 тонна антифриз, 200 тонна ойна ювиш суюқлиги, 10 минг дона тормоз колодкаси ишлаб чиқариш кўзда тутилган.

Қиймати 38,5 миллиард сўм бўлган ушбу лойиҳани 2018 йилнинг учинчи чорагида тўлиқ ишга тушириш мўлжалланмоқда. Ишлаб чиқарилган маҳсулотларнинг 45 фоизи экспортга йўналтирилади.

Лойиҳанинг биринчи босқичида 200 иш ўрни яратилади. Бозор талабларидан келиб чиқиб, келгусида қўшимча иш ўринлари ташкил этилади.

Фарғона шаҳридаги «Мадад» компанияси томонидан суюлтирилган газ учун цистерналар ва қишлоқ хўжалиги маҳсулотларини ташишга мўлжалланган тиркамалар ишлаб чиқариш лойиҳаси тақдимоти ўтказилди. Лойиҳа қиймати 40 миллиард сўм бўлиб, 30 миллиард сўми «Капиталбанк» кредити, қолгани корхонанинг ўз маблағидир.

100 иш ўрни ташкил этиладиган корхона 2018 йилда ишга туширилади. 2020 йилда бу ерда экспорт ҳажми бир йилда 1,5 миллион долларга етказиш мўлжалланган.

Ўзбекистон Президенти мазкур корхона маҳсулотларини кўздан кечирди. Суюлтирилган газни истеъмолчиларга етказиб берувчи мослама ва тиркамаларни ишлаб чиқаришни кенгайтириш, маҳсулотларни ташқи бозорга йўналтириш зарурлигини таъкидлади.

Шу ерда Фарғона шаҳридаги «Осиё олмос файз» корхонасининг лок-бўёқ, темир ва бетон кесиш мосламаларини тайёрлаш, Turon mega fayz жамиятининг гипсокартон, ПВХ гранулалар, ПВХ плёнка ва пластмасса буюмлар, Uzsalaman қўшма корхонасининг эркаклар, аёллар ва болалар пойабзаллари, Big Bilding Capital Group корхонасининг саноат чангини ушлаб қолувчи фильтр материаллари, иссиқхона каркас қисмлари ишлаб чиқариш лойиҳалари, «Ўзфармсаноат» акциядорлик концерни томонидан 2017—2018 йилларда вилоятда фармацевтика саноатини ривожлантириш манзилли дастури тақдимотлари ўтказилди.

Ўзбекистон Президенти Шавкат Мирзиёев барча лойиҳалар бўйича фикрларини билдириб, уларни янада такомиллаштириш, амалга ошириш жараёнларини тезлаштириш, иш ўринлари яратишга алоҳида эътибор қаратиш зарурлигини таъкидлади.