Shavkat Mirziyoyev Farg‘ona mexanika zavodida kichik sanoat zonasi tashkil etish, yangi mahsulotlar ishlab chiqarish loyihalari bilan tanishdi. Bu haqda O‘zA xabar bermoqda.
Farg‘ona mexanika zavodining umumiy maydoni 36,1 gektar, shundan ishlab chiqarish maydoni 9,9 gektar. Hozirgi kunda korxonada 36 turdagi sanoat mahsuloti va 31 turdagi xalq iste’moli tovari ishlab chiqarilmoqda, 330 ishchi mehnat qilmoqda.
Korxonaning bo‘sh turgan bino va inshootlarini tadbirkorlarga imtiyozli shartlarda berish, ichki va tashqi bozorda raqobatbardosh mahsulotlar tayyorlashni kengaytirish va yangi ish o‘rinlari yaratish maqsadida bu yerda kichik sanoat zonasi tashkil etilmoqda.
Sanoat zonasida yiliga 300 tonna antifriz, 200 tonna oyna yuvish suyuqligi, 10 ming dona tormoz kolodkasi ishlab chiqarish ko‘zda tutilgan.
Qiymati 38,5 milliard so‘m bo‘lgan ushbu loyihani 2018-yilning uchinchi choragida to‘liq ishga tushirish mo‘ljallanmoqda. Ishlab chiqarilgan mahsulotlarning 45 foizi eksportga yo‘naltiriladi.
Loyihaning birinchi bosqichida 200 ish o‘rni yaratiladi. Bozor talablaridan kelib chiqib, kelgusida qo‘shimcha ish o‘rinlari tashkil etiladi.
Farg‘ona shahridagi “Madad” kompaniyasi tomonidan suyultirilgan gaz uchun sisternalar va qishloq xo‘jaligi mahsulotlarini tashishga mo‘ljallangan tirkamalar ishlab chiqarish loyihasi taqdimoti o‘tkazildi. Loyiha qiymati 40 milliard so‘m bo‘lib, 30 milliard so‘mi “Kapitalbank” krediti, qolgani korxonaning o‘z mablag‘idir.
100 ish o‘rni tashkil etiladigan korxona 2018-yilda ishga tushiriladi. 2020-yilda bu yerda eksport hajmi bir yilda 1,5 million dollarga yetkazish mo‘ljallangan.
O‘zbekiston Prezidenti mazkur korxona mahsulotlarini ko‘zdan kechirdi. Suyultirilgan gazni iste’molchilarga yetkazib beruvchi moslama va tirkamalarni ishlab chiqarishni kengaytirish, mahsulotlarni tashqi bozorga yo‘naltirish zarurligini ta’kidladi.
Shu yerda Farg‘ona shahridagi “Osiyo olmos fayz” korxonasining lok-bo‘yoq, temir va beton kesish moslamalarini tayyorlash, Turon mega fayz jamiyatining gipsokarton, PVX granulalar, PVX plyonka va plastmassa buyumlar, Uzsalaman qo‘shma korxonasining erkaklar, ayollar va bolalar poyabzallari, Big Bilding Capital Group korxonasining sanoat changini ushlab qoluvchi filtr materiallari, issiqxona karkas qismlari ishlab chiqarish loyihalari, “O‘zfarmsanoat” aksiyadorlik konserni tomonidan 2017—2018-yillarda viloyatda farmatsevtika sanoatini rivojlantirish manzilli dasturi taqdimotlari o‘tkazildi.
O‘zbekiston Prezidenti Shavkat Mirziyoyev barcha loyihalar bo‘yicha fikrlarini bildirib, ularni yanada takomillashtirish, amalga oshirish jarayonlarini tezlashtirish, ish o‘rinlari yaratishga alohida e’tibor qaratish zarurligini ta’kidladi.
Izoh (0)