Жиззах политехника институтида архитектура ва қурилиш факультети очилди. Ушбу факультет қошида архитектор-лойиҳачилар малакасини ошириш ва қайта тайёрлаш минтақавий маркази ташкил этилди. Бу ҳақда ЎзА хабар бермоқда.
Янги факультет ва минтақавий марказ вилоятда замонавий йўналишлар бўйича кадрлар тайёрлаш салоҳиятини ошириш, юқори малакали архитектор, архитектор-лойиҳачи кадрлар етказиб беришга хизмат қилади.
2017/2018-ўқув йили учун қабул квоталарида архитектура факультети бакалавриат йўналишига 25 ўрин ажратилган.
— Президент ташаббуси билан архитектура ва қурилиш факультетининг очилиши вилоятда бу йўналишда мутахассислар тайёрлашда алоҳида аҳамиятга эга, — дейди Жиззах политехника институти ректори, техника фанлари доктори Алишер Усмонқулов. – Шаҳар ва қишлоқларимизнинг замонавий қиёфасини шакллантиришда амалга оширилаётган улкан бунёдкорлик талаблари ҳисобга олиниб ташкил этилган факультет архитектура, лойиҳалаштириш ва қурилиш соҳаси учун малакали кадрлар тайёрлашга хизмат қилади.
Янги ташкил этилган факультет ва малака ошириш марказида машғулотлар олиб боришга Тошкент архитектура-қурилиши ва Самарқанд давлат архитектура-қурилиши институтларининг тажрибали профессор-ўқитувчиларини жалб этиш мўлжалланмоқда.
Изоҳ (0)