10 июнь куни сайр қилиш мақсадида тоққа чиқиб кетган икки фуқародан бири йўқолиб қолгани юзасидан ахборот келиб тушди, дея хабар бермоқда Ўзбекистон Фавқулодда вазиятлар вазирлиги матбуот хизмати.
Чимён воҳасида Тошкент шаҳрида яшовчи икки фуқаро — Сергей Ким ва Шуҳрат Йўлдошев сайр қилиш мақсадида тоғга чиққан. Саёҳат давомида улардан бири — Шуҳрат Йўлдошев пиёда қайтаётган вақтида йўлдан адашиб қолган.
Бу ҳақда ҳудудий фавқулодда вазиятлар бошқармасига 10 июнь куни соат 17:40 да маълумот берилган. Шунга асосан, Тошкент вилояти Фавқулодда вазиятлар бошқармаси Тезкор ҳаракат қилиш махсус отряди қутқарувчилари томонидан зудлик билан қидирув-қутқарув ишлари олиб борилган.
Натижада 11 июнь куни соат 6:00 да қутқарувчилар томонидан Шуҳрат Йўлдошев унинг бўлиши тахмин қилинган жойдан 1600 метр узоқликда, дарахт остидан топилган ва яқин аҳоли яшаш пунктига олиб тушилган.
«Шуҳрат Йўлдошевга зарурий тиббий ёрдам кўрсатилди, унинг соғлигига хавф йўқ», — дейилади ФВВ ахборотида.
Изоҳ (0)