10-iyun kuni sayr qilish maqsadida toqqa chiqib ketgan ikki fuqarodan biri yo‘qolib qolgani yuzasidan axborot kelib tushdi, deya xabar bermoqda O‘zbekiston Favqulodda vaziyatlar vazirligi matbuot xizmati.
Chimyon vohasida Toshkent shahrida yashovchi ikki fuqaro — Sergey Kim va Shuhrat Yo‘ldoshev sayr qilish maqsadida tog‘ga chiqqan. Sayohat davomida ulardan biri — Shuhrat Yo‘ldoshev piyoda qaytayotgan vaqtida yo‘ldan adashib qolgan.
Bu haqda hududiy favqulodda vaziyatlar boshqarmasiga 10-iyun kuni soat 17:40 da ma’lumot berilgan. Shunga asosan, Toshkent viloyati Favqulodda vaziyatlar boshqarmasi Tezkor harakat qilish maxsus otryadi qutqaruvchilari tomonidan zudlik bilan qidiruv-qutqaruv ishlari olib borilgan.
Natijada 11-iyun kuni soat 6:00 da qutqaruvchilar tomonidan Shuhrat Yo‘ldoshev uning bo‘lishi taxmin qilingan joydan 1600 metr uzoqlikda, daraxt ostidan topilgan va yaqin aholi yashash punktiga olib tushilgan.
“Shuhrat Yo‘ldoshevga zaruriy tibbiy yordam ko‘rsatildi, uning sog‘ligiga xavf yo‘q”, — deyiladi FVV axborotida.
Izoh (0)