Футбол бўйича Ўзбекистон миллий терма жамоаси бош мураббийи Самвел Бабаян ўз лавозимида камида 5 сентябрга қадар қолади. Бу ҳақда ЎФФ матбуот хизмати хабар берди.
Ўзбекистон футбол федерацияси Жаҳон чемпионати саралаш ўйинларидан кейин ишқибозлар ва турли ОАВда юзага келган вазиятдан хабардор. Ташкилот миллий терма жамоанинг кейинги тақдири ҳақидаги баҳс ва мунозаралар, таклиф ва мурожаатларни жуда яхши тушуниб турибди ҳамда ҳар бир футбол ишқибози ўзининг шахсий фикрига, уни эркин ифода қилиш ваколатига эга эканлигига ҳурмат билан қарайди, деб ёзди матбуот хизмати.
Миллий терма жамоанинг Жаҳон чемпионати саралаш ўйинларидаги иштироки, терма жамоа мураббийлар штаби аъзолари атрофидаги хавотирли фикрларга ҳурмат сақлаган ҳолда ЎФФ Самвел Бабаян бошчилигидаги мураббийлар штабига иш ва вазифани охирига етказиб қўйиш учун имконият беради. Ўзбекистон терма жамоасининг 31 августда Хитойга қарши сафар ўйини ҳамда 5 сентябрь куни Кореяга қарши Тошкентдаги ўйинларига жамоани Самвел Бабаян тайёрлайди.
Миллий терма жамоанинг кейинги тақдири бўйича қарор 5 сентябрь кунги Корея билан ўйиндан кейин қабул қилинади.
Маълумот учун, ЖЧ—2018 саралашининг «А» гуруҳида бунга қадар Хитой, Қатар, Жанубий Корея каби термалар ўз мураббийини истеъфога чиқарганди. Бунда Жанубий Корея термаси Ўзбекистондан яхшироқ натижа қайд этиб турган бўлса, қатарликлар устози Хорхе Фосатти Жанубий Кореяни ютганига қарамай вазифасидан кетганди. Саралашда 4 та учрашувни бой берганига қарамай, Самвел Бабаян ўз ишида давом этадиган бўлди.
Изоҳ (0)