Эронга қарши ўйин олдидан ФИФА журналисти Александр Гейнрих билан суҳбатлашди

Ўзбекистон миллий терма жамоаси ҳужумчиси Александр Гейнрих ФИФА расмий сайтига интервью берди. ЎФФ матбуот хизмати томонидан ташкил қилинган суҳбат давомида тажрибали футболчи фаолиятидаги қийинчиликлар, саралашдаги бўлажак ўйинлар, Жаҳон чемпионатига чиқиш орзуси ҳамда Сурияга қарши ўйиндаги селфиси ҳақида сўзлаб берди.

Селфи ҳақида

ФИФА мухбири Александр Гейнрихнинг Сурия билан ўйин вақтида олган селфиси олдиндан кўрилган тайёргарлик маҳсулими ёки йўқ — қизиқиб кўрди.

Селфи ўз-ўзидан келиб чиқди. Журналист Нодирхўжа Йўлдошев телефонини менга узатди ва биз ажойиб эҳтирослар остида селфига тушдик.

Александр Гейнрих, ҳужумчи

Ўзбекистонлик ҳужумчидан интервью олган мухбир Гейнрихни бир неча кун олдин «Рома» билан хайрлашган Франческо Тоттининг голли селфисига қиёслади.

Тотти менга ёқади, у ҳақиқий афсона. Унинг сўнгги ўйинини томоша қилдим ва мухлислар билан хайрлашаётганида йиғладим. У сингари гол нишонлаганимдан мамнунман.

Александр Гейнрих, ҳужумчи

Мундиал орзуси

ЖЧ—2018 турнирига саралаш босқичи ҳақида фикр билдирар экан, Александр Гейнрих сўнгги турда Жанубий Кореяга қарши кечадиган ўйин ҳал қилувчи аҳамиятга эга бўладими ёки йўқ — гапириш эрта эканини айтди.

Бу ҳақда гапиришга ҳали эрта. Жанубий Кореяга қарши ўйин ҳал қилувчи бўлиши учун олдиндаги ўйинларда очко олишимиз керак. Шундан кейингина уни ҳал қилувчи десак бўлади. ЖЧ—2018 мусобақасига тўғридан-тўғри йўлланмани олиш учун бор кучимизни берамиз. Барчаси ўз қўлимизда.

Александр Гейнрих, ҳужумчи

Гейнрих футболни қандай якунлашни истайди?

Россия мундиалига боришни жуда хоҳлардим. ЖЧ қандай экани борасида тушунчага эгаман. 2003 йил БАА мезбонлик қилган 20 ёшгача футболчилар ўртасидаги Жаҳон чемпионатида иштирок этганман. Фаолиятимни Россия—2018 да ўйнаб тугатишни истардим.

Александр Гейнрих, ҳужумчи

Карьера

Александр Гейнрих Ўзбекистондан ташқари Россия, БАА, Жанубий Корея чемпионатларида тўп сурган. Айни вақтда у Қозоғистонда ўйнамоқда. Футболчи турли мамлакатларда турфа хил футбол маданиятига дуч келгани ва ўзига яраша тажриба орттиргани ҳақида айтди.

Россияга биринчи борганимда жуда ёш эдим. Мен у ерда футбол ўйнаш осон эмаслигини тушундим. Машҳур лига, номдор футболчилар, катта пул... Асосий таркиб аъзоси бўлиш осон бўлмаганини тан олиш керак.

БААда умуман бошқача бўлди: ўзгача техника ва ноодатий маданият. Россия ва БААдаги фаолиятим давомида ўзим учун керакли хулосалар чиқариб, тажриба тўплаганман.

Жанубий Кореяда қийналдим. У ердаги ҳаёт тарзи, маҳаллий овқатлар, машғулотларга кўникиш осон кечмаган. Бир ой ўтгач, К-лигада менга мушкул бўлишини тушундим. Менимча, Кореядаги карьерам энг қийини бўлган.

Қозоғистонда анчадан буён ўйнайман ва бу ер менга маъқул. Қозоғистон ва Ўзбекистон бир-бирига яқин бўлгани учун, фарқ деярли йўқ ва айнан шу нарса менга қулайлик яратмоқда.

Александр Гейнрих, ҳужумчи

Ҳужумчи 2002 йилдан буён миллий терма жамоа шарафини ҳимоя қилиб келади. Шу вақт мобайнида у 93 учрашув ўтказиб, 31 та голга муаллифлик қилди. Терма сафидаги ўйинлари сони 100 тага етиб қолганига қарамай, Гейнрих индивидуал натижалар муҳим эмаслигини, асосийси жамоавий ўйин эканини таъкидлади.

Мен шахсий натижа ёки рекордлар ортидан қувмайман. Футбол — жамоавий ўйин ва бу энг асосийси.

Александр Гейнрих, ҳужумчи

Александр Гейнрих Ўзбекистон сафида гол урса, уни қандай нишонлаши ҳақидаги сўнгги саволга қуйидагича жавоб берди: «Навбатдаги голимни қандай киритишимни ТВ орқали кўрасиз. Бу сиз учун ‘сюрприз’ бўлади».