Eronga qarshi o‘yin oldidan FIFA jurnalisti Aleksandr Geynrix bilan suhbatlashdi

O‘zbekiston milliy terma jamoasi hujumchisi Aleksandr Geynrix FIFA rasmiy saytiga intervyu berdi. O‘FF matbuot xizmati tomonidan tashkil qilingan suhbat davomida tajribali futbolchi faoliyatidagi qiyinchiliklar, saralashdagi bo‘lajak o‘yinlar, Jahon chempionatiga chiqish orzusi hamda Suriyaga qarshi o‘yindagi selfisi haqida so‘zlab berdi.

Selfi haqida

FIFA muxbiri Aleksandr Geynrixning Suriya bilan o‘yin vaqtida olgan selfisi oldindan ko‘rilgan tayyorgarlik mahsulimi yoki yo‘q — qiziqib ko‘rdi.

Selfi o‘z-o‘zidan kelib chiqdi. Jurnalist Nodirxo‘ja Yo‘ldoshev telefonini menga uzatdi va biz ajoyib ehtiroslar ostida selfiga tushdik.

Aleksandr Geynrix, hujumchi

O‘zbekistonlik hujumchidan intervyu olgan muxbir Geynrixni bir necha kun oldin “Roma” bilan xayrlashgan Franchesko Tottining golli selfisiga qiyosladi.

Totti menga yoqadi, u haqiqiy afsona. Uning so‘nggi o‘yinini tomosha qildim va muxlislar bilan xayrlashayotganida yig‘ladim. U singari gol nishonlaganimdan mamnunman.

Aleksandr Geynrix, hujumchi

Mundial orzusi

JCh—2018 turniriga saralash bosqichi haqida fikr bildirar ekan, Aleksandr Geynrix so‘nggi turda Janubiy Koreyaga qarshi kechadigan o‘yin hal qiluvchi ahamiyatga ega bo‘ladimi yoki yo‘q — gapirish erta ekanini aytdi.

Bu haqda gapirishga hali erta. Janubiy Koreyaga qarshi o‘yin hal qiluvchi bo‘lishi uchun oldindagi o‘yinlarda ochko olishimiz kerak. Shundan keyingina uni hal qiluvchi desak bo‘ladi. JCh—2018 musobaqasiga to‘g‘ridan-to‘g‘ri yo‘llanmani olish uchun bor kuchimizni beramiz. Barchasi o‘z qo‘limizda.

Aleksandr Geynrix, hujumchi

Geynrix futbolni qanday yakunlashni istaydi?

Rossiya mundialiga borishni juda xohlardim. JCh qanday ekani borasida tushunchaga egaman. 2003-yil BAA mezbonlik qilgan 20 yoshgacha futbolchilar o‘rtasidagi Jahon chempionatida ishtirok etganman. Faoliyatimni Rossiya—2018 da o‘ynab tugatishni istardim.

Aleksandr Geynrix, hujumchi

Karyera

Aleksandr Geynrix O‘zbekistondan tashqari Rossiya, BAA, Janubiy Koreya chempionatlarida to‘p surgan. Ayni vaqtda u Qozog‘istonda o‘ynamoqda. Futbolchi turli mamlakatlarda turfa xil futbol madaniyatiga duch kelgani va o‘ziga yarasha tajriba orttirgani haqida aytdi.

Rossiyaga birinchi borganimda juda yosh edim. Men u yerda futbol o‘ynash oson emasligini tushundim. Mashhur liga, nomdor futbolchilar, katta pul... Asosiy tarkib a’zosi bo‘lish oson bo‘lmaganini tan olish kerak.

BAAda umuman boshqacha bo‘ldi: o‘zgacha texnika va noodatiy madaniyat. Rossiya va BAAdagi faoliyatim davomida o‘zim uchun kerakli xulosalar chiqarib, tajriba to‘plaganman.

Janubiy Koreyada qiynaldim. U yerdagi hayot tarzi, mahalliy ovqatlar, mashg‘ulotlarga ko‘nikish oson kechmagan. Bir oy o‘tgach, K-ligada menga mushkul bo‘lishini tushundim. Menimcha, Koreyadagi karyeram eng qiyini bo‘lgan.

Qozog‘istonda anchadan buyon o‘ynayman va bu yer menga ma’qul. Qozog‘iston va O‘zbekiston bir-biriga yaqin bo‘lgani uchun, farq deyarli yo‘q va aynan shu narsa menga qulaylik yaratmoqda.

Aleksandr Geynrix, hujumchi

Hujumchi 2002-yildan buyon milliy terma jamoa sharafini himoya qilib keladi. Shu vaqt mobaynida u 93 uchrashuv o‘tkazib, 31 ta golga mualliflik qildi. Terma safidagi o‘yinlari soni 100 taga yetib qolganiga qaramay, Geynrix individual natijalar muhim emasligini, asosiysi jamoaviy o‘yin ekanini ta’kidladi.

Men shaxsiy natija yoki rekordlar ortidan quvmayman. Futbol — jamoaviy o‘yin va bu eng asosiysi.

Aleksandr Geynrix, hujumchi

Aleksandr Geynrix O‘zbekiston safida gol ursa, uni qanday nishonlashi haqidagi so‘nggi savolga quyidagicha javob berdi: “Navbatdagi golimni qanday kiritishimni TV orqali ko‘rasiz. Bu siz uchun ‘syurpriz’ bo‘ladi”.