Ўзбекистон Президенти Шавкат Мирзиёевнинг «Ёнғоқ ишлаб чиқарувчилар ва экспорт қилувчилар уюшмасини тузиш ва унинг фаолиятини ташкил этиш тўғрисида»ги қарори қабул қилинди. Бу ҳақда ЎзА хабар бермоқда.
Мазкур қарорда Ёнғоқ ишлаб чиқарувчилар ва экспорт қилувчилар уюшмаси ва унинг таркибида масъулияти чекланган жамият шаклида Ёнғоқчилик илмий-тадқиқот маркази, Ёнғоқ логистика маркази, «Саг агро МТП» МЧЖ, Жиззах, Қашқадарё, Сурхондарё, Наманган ва Тошкент вилоятларида ҳудудий «Ёнғоқагро» МЧЖ ташкил этиш тўғрисидаги таклифларга розилик берилган.
Ёнғоқнинг серҳосил замонавий плантацияларини яратиш, ҳудудларда ёнғоқ ишлаб чиқариш ҳажмини кўпайтириш чораларини кўриш, ёнғоқнинг серҳосил ниҳолларини лаборатория шароитларида етиштиришни ташкил этиш, инновациявий технологияларни ёнғоқ етиштириш жараёнига жорий этиш, хорижий инвестицияларни жалб қилиш, давлат кўмагини олишда ҳар томонлама кўмаклашиш уюшманинг асосий вазифалари ва фаолият йўналишлари этиб белгиланди.
«Ёнғоқчилик илмий-тадқиқот маркази» МЧЖ ёнғоқни маҳаллий иқлимга мослаштириш ва районлаштириш, серҳосил, тез пишар, қурғоқчиликка чидамли ва вируссиз навлари бўйича илмий-тадқиқот ишларини амалга оширади.
«Ёнғоқ логистика маркази» МЧЖ ёнғоқ маҳсулотларини қайта ишлаш ва сақлаш бўйича хизматлар кўрсатишга, шунингдек, экспорт қилинадиган маҳсулотларни тайёрлаш ва божхона ҳужжатлари расмийлаштирувини таъминлашга ихтисослашади.
«Саг агро МТП» МЧЖ ёнғоқ ишлаб чиқарувчиларга агротехник тадбирларни амалга ошириш бўйича механизация хизматлари кўрсатади.
Қарорда Қишлоқ ва сув хўжалиги вазирлиги, Андижон, Қашқадарё, Жиззах, Наманган, Самарқанд, Сурхондарё, Тошкент ва Фарғона вилоятлари ҳокимликлари, Ёнғоқ ишлаб чиқарувчилар ва экспорт қилувчилар уюшмаси умумий майдони 10 минг гектаргача бўлган ер участкалари ва ёнғоқ плантацияларини барпо этиш бўйича лойиҳа ташаббускорлари — тадбиркорлик субъектлари танлаб олинишини таъминлаши кўзда тутилган.
Ёнғоқ ишлаб чиқарувчилар ва экспорт қилувчилар уюшмаси Самарқанд шаҳрида жойлаштирилади.
Изоҳ (0)