Бугунги кунда интернетда ўз жонига қасд қилишга ундайдиган ўйинлар кенг тарқалмоқда. Мазкур ҳаракатларнинг жамият учун хавфи юқори бўлганлиги сабабли ўзини ўлдиришга ундаганлик учун жавобгарликни назарда тутувчи нормани жиноят қонунчилигига киритишни даврнинг ўзи тақозо этмоқда. Бу ҳақда Олий Мажлис Қонунчилик палатаси депутати Шерзод Тўхташев фикр юритган.
Ўзбекистон Республикаси Олий суди томонидан Қонунчилик палатасига «Ўзбекистон Республикаси Жиноят кодексига ўзгартиш ва қўшимчалар киритиш тўғрисида»ги қонун лойиҳаси киритилди.
Қонунчилик палатаси томонидан ишчи гуруҳи ташкил этилиб, унинг йиғилишларига ички ишлар, Олий суд ва Бош прокуратура амалиётчи мутахассислари жалб этилди. Қонун лойиҳаси жамоатчилик жалб этилган ҳолда кенг муҳокамалардан ўтказилди.
Хорижий давлатлар тажрибаси ўрганилганда бир қатор, масалан, Беларус, Арманистон, Қирғизистон ва Туркманистон каби давлатларда ўз жонига қасд ёки суиқасд қилишга ундаш жиноятлари учун жавобгарлик белгилангани аниқланди.
Қонун лойиҳаси билан Ўзбекистон Республикасининг Жиноят кодексига 103’1-модда киритилиб, ўзини-ўзи ўлдиришга ундаганлик, яъни кўндириш, алдаш ёки бошқа йўл билан ўзга шахсда ўзини ўлдириш ҳиссини уйғотиш натижасида шахс ўзини ўлдирган ёки ўзини ўлдиришга қасд қилган бўлса, 2 йилдан 5 йилгача озодликни чеклаш ёхуд 5 йилгача озодликдан маҳрум қилиш билан жазоланиши назарда тутилмоқда.
Шунингдек, мазкур ҳаракатларни вояга етмаган шахсга ёки ҳомиладорлиги айбдорга аён бўлган аёлга нисбатан, бир гуруҳ шахслар томонидан олдиндан тил бириктириб ёки телекоммуникация тармоқлари, жумладан, интернет тармоғидан фойдаланиб содир этилса 7 йилдан 10 йилгача озодликдан маҳрум қилиш билан жазоланиши белгиланмоқда.
Изоҳ (0)