Bugungi kunda internetda o‘z joniga qasd qilishga undaydigan o‘yinlar keng tarqalmoqda. Mazkur harakatlarning jamiyat uchun xavfi yuqori bo‘lganligi sababli o‘zini o‘ldirishga undaganlik uchun javobgarlikni nazarda tutuvchi normani jinoyat qonunchiligiga kiritishni davrning o‘zi taqozo etmoqda. Bu haqda Oliy Majlis Qonunchilik palatasi deputati Sherzod To‘xtashev fikr yuritgan.
O‘zbekiston Respublikasi Oliy sudi tomonidan Qonunchilik palatasiga “O‘zbekiston Respublikasi Jinoyat kodeksiga o‘zgartish va qo‘shimchalar kiritish to‘g‘risida”gi qonun loyihasi kiritildi.
Qonunchilik palatasi tomonidan ishchi guruhi tashkil etilib, uning yig‘ilishlariga ichki ishlar, Oliy sud va Bosh prokuratura amaliyotchi mutaxassislari jalb etildi. Qonun loyihasi jamoatchilik jalb etilgan holda keng muhokamalardan o‘tkazildi.
Xorijiy davlatlar tajribasi o‘rganilganda bir qator, masalan, Belаrus, Armaniston, Qirg‘iziston va Turkmaniston kabi davlatlarda o‘z joniga qasd yoki suiqasd qilishga undash jinoyatlari uchun javobgarlik belgilangani aniqlandi.
Qonun loyihasi bilan O‘zbekiston Respublikasining Jinoyat kodeksiga 103’1-modda kiritilib, o‘zini-o‘zi o‘ldirishga undaganlik, ya’ni ko‘ndirish, aldash yoki boshqa yo‘l bilan o‘zga shaxsda o‘zini o‘ldirish hissini uyg‘otish natijasida shaxs o‘zini o‘ldirgan yoki o‘zini o‘ldirishga qasd qilgan bo‘lsa, 2 yildan 5 yilgacha ozodlikni cheklash yoxud 5 yilgacha ozodlikdan mahrum qilish bilan jazolanishi nazarda tutilmoqda.
Shuningdek, mazkur harakatlarni voyaga yetmagan shaxsga yoki homiladorligi aybdorga ayon bo‘lgan ayolga nisbatan, bir guruh shaxslar tomonidan oldindan til biriktirib yoki telekommunikatsiya tarmoqlari, jumladan, internet tarmog‘idan foydalanib sodir etilsa 7 yildan 10 yilgacha ozodlikdan mahrum qilish bilan jazolanishi belgilanmoqda.
Izoh (0)