Тошкентда Huawei P10 смартфони сотувга чиқди

Шу йилнинг бошида MWC 2017 анжуманида намойиш қилинган Huawei P10 смартфони Ўзбекистонда сотувга чиқди, деб хабар берди «Mobinfo.uz».

Смартфон 5,1 дюймли Full HD ва 1920х1080 пикселли дисплей билан жиҳозланган. Kirin 960 процессори эга, аккумуляторининг ҳажми эса 3200 мА/соат сиғимга тенг. 20 мегапикселли монохром ва 12 мегапикселга тенг рангли сенсорли иккита асосий камерага эга, фронтал камераси эса 8 мегапиксел. Android 7.0 Nougat операцион тизимида ишлайди.

Huawei P10’нинг асосий жиҳати — Leica компанияси иштирокида ишлаб чиқарилган иккита асосий орқа камерага эгалиги. Улардан бири 12 мегапиксел ва у рангли тасвирни беради, иккинчиси эса 20 мегапиксел ва монохром тартибда суратга олишни амалга оширади. Ишлаб чиқарувчининг маълумотларига кўра, бу тасвирнинг қоронғида ҳам аниқ чиқишини таъминлайди.

Тошкент савдо марказларида P10’нинг 4 гигабайтли тезкор хотира ва 64 гигабайт ички хотирага эга ҳамда иккита сим-карта кетувчи модели 4 860 000 сўмдан сотилмоқда.

Номи келтирилган қурилмани кўрсатилган нархда сотиб олишга «Дарё» нашри кафолат бермайди. Қурилмалар ва уларнинг нархлари ҳақидаги ахборот фақат танишиш учун тақдим этилган.