Бильбаонинг «Атлетик» клуби бош мураббий Эрнесто Валверде жамоани тарк этаётгани ҳақида хабар берди. Мутахассис келаси мавсумни ката эҳтимол билан бошқа клубда бошлайди.
«Чемпионат» нашрининг хабар беришича, Вальверде бугун — 24 май куни «Атлетик»ни тарк этиши муносабати билан матбуот анжуманида иштирок этади ва журналистларни қизиқтирган саволларга жавоб қайтаради.
Аввалроқ El Correo нашри «Барселона» ва Эрнесто Вальверде ўзаро ҳамкорлик борасида келишувга эришгани ҳақида айтиб ўтганди. Каталония клуби президенти Хосеп Мария Бартомеу футболчиларга янги бош мураббий ким бўлиши ҳақида аллқачон эълон қилиб бўлган.
«Барселона»нинг амалдаги бош мураббийи Луис Энрике ўзининг сўнгги учрашувини 27 май куни Испания кубоги финалида «Алавес»га қарши ўтказади. Шундан келиб чиқиб, «Барселона» янги мураббий номини 29 май куни расман эълон қилишни режалаштирган.
Эрнесто Вальверде 2015 йил Испания Суперкубогини «Атлетик» билан қўлга киритган ва икки ўйин натижасига кўра айнан «Барселона»ни таслим қилганди. Бильбаода 4:0 ҳисоби қайд этилган бўлса, «Камп Ноу»даги жавоб ўйини 1:1 ҳисобида якунланган.
Изоҳ (0)