Bilbaoning “Atletik” klubi bosh murabbiy Ernesto Valverde jamoani tark etayotgani haqida xabar berdi. Mutaxassis kelasi mavsumni kata ehtimol bilan boshqa klubda boshlaydi.
“Chempionat” nashrining xabar berishicha, Valverde bugun — 24-may kuni “Atletik”ni tark etishi munosabati bilan matbuot anjumanida ishtirok etadi va jurnalistlarni qiziqtirgan savollarga javob qaytaradi.
Avvalroq El Correo nashri “Barselona” va Ernesto Valverde o‘zaro hamkorlik borasida kelishuvga erishgani haqida aytib o‘tgandi. Kataloniya klubi prezidenti Xosep Mariya Bartomeu futbolchilarga yangi bosh murabbiy kim bo‘lishi haqida allqachon e’lon qilib bo‘lgan.
“Barselona”ning amaldagi bosh murabbiyi Luis Enrike o‘zining so‘nggi uchrashuvini 27-may kuni Ispaniya kubogi finalida “Alaves”ga qarshi o‘tkazadi. Shundan kelib chiqib, “Barselona” yangi murabbiy nomini 29-may kuni rasman e’lon qilishni rejalashtirgan.
Ernesto Valverde 2015-yil Ispaniya Superkubogini “Atletik” bilan qo‘lga kiritgan va ikki o‘yin natijasiga ko‘ra aynan “Barselona”ni taslim qilgandi. Bilbaoda 4:0 hisobi qayd etilgan bo‘lsa, “Kamp Nou”dagi javob o‘yini 1:1 hisobida yakunlangan.
Izoh (0)