Профессионал бокснинг супер-оғир вазн тоифасида жаҳон чемпионлигини қўлга киритган собиқ спортчи Руслан Чагаев 10 йиллик танаффусдан сўнг ватанига қайтди, деб ёзди «Оламспорт». Нашр бундан фойдаланиб Чагаев билан суҳбат уюштирган.
Андижон ҳақида
Андижонда дунёга келдим. Боксдаги фаолиятим шу ерда бошланди. Ўзбекистонга қайтган илк кунимдаёқ Андижонга бордим. Ишни отам ва онам мангу қўним топган жойни зиёрат қилишдан бошладим. Ҳар сафар ташрифимда биринчи борар манзилим қабристон бўлади, ўтганларнинг руҳига тиловат қиламан, дунёга келишимга сабабчи бўлган инсонларни эслайман.Андижон ҳокими «ўзгаришлар қандай» деган саволни берди. Очиғи, сўз билан ифодалаб бўлмайди, ишонинг. Бу баландпарвоз сўзлар эмас, ўн йил аввалги ҳолат билан таққосласак, осмон билан ерча фарқ кўзга ташланади. Шаҳар 60 фоизга ўзгариб кетган.
Ёшлигим ўтган туман кўчаларида адашиб қолай дедим. Жин кўчалар ўрнини машиналар юрадиган кенг ва равон кўчалар эгаллаган. Эски шаҳарда турганимни ўртоқларим кулиб айтиб беришганидан кейингина билдим. Яхшиям ёнимда улар бор экан.
Руслан Чагаев, бокс юлдузи
Ўзбекистонликлар ҳақида
Ўзбекистонга бир ойга келгандим. Биласизми, ҳозир мазза қиляпман, тўйиб-тўйиб нафас олмоқдаман. Ўйлайманки, бу сўнгги ташриф эмас. Энди тез-тез келиб тураман.Одамлар ҳақида айтсам, улар асло ўзгармаган. Дунёнинг кўплаб мамлакатларида бўлдим. Лекин бундай танти, меҳридарё, қўли очиқ, меҳмондўст халқни ҳеч қаерда кўрмадим.
Ўзбекистонда эканимни билган германиялик дўстларим бу ерга келиш истаклари борлигини айтишди. Жуда хурсанд бўлдим. Улар келишди, таассуротлари юзасидан айтган биринчи гаплари айнан меҳмондўст халқимизга тегишли эди. Ўзининг сўнгги нонини ҳам дўсти билан баҳам кўрадиган халқ бу.
Андижонда ўзим туғилган ҳовлимда бўлдим. Бу ерда ҳозир ягона жигаргўшам — опам яшайди. Бир пайтлар бу ҳовлида онам, опам ва мен яшардик. Ўша вақтлар худди кино лентаси каби кўз олдимдан ўтди. Бироз йиғлаб ҳам олдим...
Руслан Чагаев, бокс юлдузи
Ош ҳақида
Ишонасизми, Ўзбекистонга келиб вазнимни 10 килограммча ошириб олдим. Аҳир бизда ҳамма вилоятларда ош тайёрланади. Тошкентда ўзига яраша чойхона ва тўй ошлари, водий, воҳа ёки Самарқанднинг ўзига хос ошлари бор. Билмадим-у, лекин менга ўзимизнинг Андижон самоварида тайёрланадиган ош кўпроқ ёқади. Бугун кечга ош тановвул қилсам, эртага эрталаб ҳам ундан қайтмайман.Руслан Чагаев, бокс юлдузи
Осиё чемпионатидаги 9 та олтин
Боксчиларимиз бу муваффақиятга ўз меҳнатлари эвазига эришди. Бунгача Рио Олимпиадасида тарихий ютуқ қўлга киритилганди. Олимпиада олди мураббийлар билан гаплашганимда, улар ҳеч бўлмаса битта олтин медаль олишимиз керак, дейишганди. Чунки шу вақтга қадар Муҳаммадқодирнинг олтини ягоналигини сақлаб келаётганди.Буни қарангки, Ўзбекистон Рио—2016 Олимпиадасининг чинакамига кашфиёт жамоасига айланди. Ҳозир боксчиларимизнинг олтин авлоди шаклланган десам, муболаға бўлмайди.
Шу ўринда бир нарсани айтишим жоиз. Катта спорт ташкилотлари, масалан, ўша AIBA билан алоқаларни янада мустаҳкамлаш лозим. Мен бунда таниш-билишчилик қилиш, пул бериш ҳақида гапирмаяпман, дипломатик алоқаларни кучайтиришни назарда тутяпман. Ҳакамлар бизга ғалабани тақдим этиши шарт эмас, боксчилар ўз кучи билан бунга эришади. Шунчаки, ҳалол ғалабамизни ҳам тортиб олишмасин. Бунинг учун юқори ташкилотлар билан дўстона муносабат бўлиши керак.
Руслан Чагаев, бокс юлдузи
Изоҳ (0)