Professional boksning super-og‘ir vazn toifasida jahon chempionligini qo‘lga kiritgan sobiq sportchi Ruslan Chagayev 10 yillik tanaffusdan so‘ng vataniga qaytdi, deb yozdi “Olamsport”. Nashr bundan foydalanib Chagayev bilan suhbat uyushtirgan.
Andijon haqida
Andijonda dunyoga keldim. Boksdagi faoliyatim shu yerda boshlandi. O‘zbekistonga qaytgan ilk kunimdayoq Andijonga bordim. Ishni otam va onam mangu qo‘nim topgan joyni ziyorat qilishdan boshladim. Har safar tashrifimda birinchi borar manzilim qabriston bo‘ladi, o‘tganlarning ruhiga tilovat qilaman, dunyoga kelishimga sababchi bo‘lgan insonlarni eslayman.Andijon hokimi “o‘zgarishlar qanday” degan savolni berdi. Ochig‘i, so‘z bilan ifodalab bo‘lmaydi, ishoning. Bu balandparvoz so‘zlar emas, o‘n yil avvalgi holat bilan taqqoslasak, osmon bilan yercha farq ko‘zga tashlanadi. Shahar 60 foizga o‘zgarib ketgan.
Yoshligim o‘tgan tuman ko‘chalarida adashib qolay dedim. Jin ko‘chalar o‘rnini mashinalar yuradigan keng va ravon ko‘chalar egallagan. Eski shaharda turganimni o‘rtoqlarim kulib aytib berishganidan keyingina bildim. Yaxshiyam yonimda ular bor ekan.
Ruslan Chagayev, boks yulduzi
O‘zbekistonliklar haqida
O‘zbekistonga bir oyga kelgandim. Bilasizmi, hozir mazza qilyapman, to‘yib-to‘yib nafas olmoqdaman. O‘ylaymanki, bu so‘nggi tashrif emas. Endi tez-tez kelib turaman.Odamlar haqida aytsam, ular aslo o‘zgarmagan. Dunyoning ko‘plab mamlakatlarida bo‘ldim. Lekin bunday tanti, mehridaryo, qo‘li ochiq, mehmondo‘st xalqni hech qayerda ko‘rmadim.
O‘zbekistonda ekanimni bilgan germaniyalik do‘stlarim bu yerga kelish istaklari borligini aytishdi. Juda xursand bo‘ldim. Ular kelishdi, taassurotlari yuzasidan aytgan birinchi gaplari aynan mehmondo‘st xalqimizga tegishli edi. O‘zining so‘nggi nonini ham do‘sti bilan baham ko‘radigan xalq bu.
Andijonda o‘zim tug‘ilgan hovlimda bo‘ldim. Bu yerda hozir yagona jigargo‘sham — opam yashaydi. Bir paytlar bu hovlida onam, opam va men yashardik. O‘sha vaqtlar xuddi kino lentasi kabi ko‘z oldimdan o‘tdi. Biroz yig‘lab ham oldim...
Ruslan Chagayev, boks yulduzi
Osh haqida
Ishonasizmi, O‘zbekistonga kelib vaznimni 10 kilogrammcha oshirib oldim. Ahir bizda hamma viloyatlarda osh tayyorlanadi. Toshkentda o‘ziga yarasha choyxona va to‘y oshlari, vodiy, voha yoki Samarqandning o‘ziga xos oshlari bor. Bilmadim-u, lekin menga o‘zimizning Andijon samovarida tayyorlanadigan osh ko‘proq yoqadi. Bugun kechga osh tanovvul qilsam, ertaga ertalab ham undan qaytmayman.Ruslan Chagayev, boks yulduzi
Osiyo chempionatidagi 9 ta oltin
Bokschilarimiz bu muvaffaqiyatga o‘z mehnatlari evaziga erishdi. Bungacha Rio Olimpiadasida tarixiy yutuq qo‘lga kiritilgandi. Olimpiada oldi murabbiylar bilan gaplashganimda, ular hech bo‘lmasa bitta oltin medal olishimiz kerak, deyishgandi. Chunki shu vaqtga qadar Muhammadqodirning oltini yagonaligini saqlab kelayotgandi.Buni qarangki, O‘zbekiston Rio—2016 Olimpiadasining chinakamiga kashfiyot jamoasiga aylandi. Hozir bokschilarimizning oltin avlodi shakllangan desam, mubolag‘a bo‘lmaydi.
Shu o‘rinda bir narsani aytishim joiz. Katta sport tashkilotlari, masalan, o‘sha AIBA bilan aloqalarni yanada mustahkamlash lozim. Men bunda tanish-bilishchilik qilish, pul berish haqida gapirmayapman, diplomatik aloqalarni kuchaytirishni nazarda tutyapman. Hakamlar bizga g‘alabani taqdim etishi shart emas, bokschilar o‘z kuchi bilan bunga erishadi. Shunchaki, halol g‘alabamizni ham tortib olishmasin. Buning uchun yuqori tashkilotlar bilan do‘stona munosabat bo‘lishi kerak.
Ruslan Chagayev, boks yulduzi
Izoh (0)