12 май — Халқаро ҳамширалар куни муносабати билан Ўзбекистон Соғлиқни сақлаш вазирлигида ҳамширалик ишини янада такомиллаштириш борасидаги долзарб вазифаларга бағишланган республика анжумани бўлиб ўтди. Бу ҳақда вазирлик ахборот хизмати «Дарё»га маълум қилди.
Соғлиқни сақлаш вазири Алишер Шодмоновнинг таъкидлашича, Ўзбекистондаги ўрта ва олий маълумоти ҳамширалар тайёрлаш бўйича ўзига хос тизим узлуксиз такомиллаштирилмоқда.
Ҳозирги кунда Тошкент тиббиёт академияси ва тиббиёт институтларининг «Олий ҳамширалик иши» бўлимларида анестезиология ва реанимация, хирургия, акушерлик ва менежмент йўналишлари бўйича 3500 дан зиёд олий маълумотли бакалавр хамширалар тайёрланди, 100 нафардан ортиқ ҳамширалар магистр даражасига эга.
Эътиборли томони, эндиликда ҳамшираларимиз илмий иш қилиб, олимлик даражасига етишлари учун барча имкониятлар яратилган. Ҳамширадан фақат доимий ўз устида ишлаш, илмга чанқоқлик талаб этилади.Анжуманда қайд этилганидек, истиқболда Республика ўрта тиббиёт ва доришунос ходимлар малакасини ошириш ва ихтисослаштиришдан ўтказиш марказини тубдан ислоҳ қилиш, бугунги замон талаблари даражасида қайта шакллантириш белгиланган. Ушбу марказни молиялаштириш ҳажми оширилиб, моддий техника базаси мустаҳкамланади.Алишер Шодмонов, Ўзбекистон соғлиқни сақлаш вазири
Аввалроқ Вазирлар Маҳкамасининг «Тиббиёт ходимларининг малакасини ошириш ва уларни қайта тайёрлаш тизимини такомиллаштиришга доир қўшимча чора-тадбирлар тўғрисида»ги қарори қабул қилиниб, 2017/2018 ўқув йилидан бошлаб Тошкент врачлар малакасини ошириш институтида олий маълумотли тиббиёт ҳамширалари малакасини ошириш кўрсатиб ўтилгани ҳақида хабар берилган эди.
Изоҳ (0)