Ички ишлар вазири: Раҳмат Оқилов Ўзбекистондан чиқиб кетишидан олдин унинг ҳеч қандай ғайриқонуний фаолияти кузатилмаган

Халқаро пресс-клубнинг 2 майда бўлиб ўтган йиғилишида иштирок этган Ўзбекистон ички ишлар вазири Абдусалом Азизов хорижий мамлакатларда юз берган терактларда гумонланган Ўзбекистон фуқаролари ҳақидаги саволларга жавоб берди.

Вазирнинг қайд этишича, Туркиянинг Истанбул шаҳрида тунги клубга ҳужум қилган Абдулқодир Машарипов ва Швециянинг Стокгольм шаҳрида юз берган теракт ижрочиси деб топилган Раҳмат Оқилов ўз вақтида Ўзбекистон ички ишлар ва миллий хавфсизлик органлари томонидан халқаро қидирувга берилган.

Раҳмат Оқилов у ерга кетгунига қадар оддий фуқаро бўлган, унинг ҳеч қандай ғайриқонуний фаолияти кузатилмаган. Бироқ хорижга чиққач у террористик гуруҳларнинг тарғиботига учган. Унга нисбатан халқаро қидирув эълон қилинган.

Абдусалом Азизов, Ўзбекистон Республикаси ички ишлар вазири, генерал майор

Ички ишлар вазири яқин вақт ичида халқаро қидирувда бўлган шахсларнинг суратларини ижтимоий тармоқларга жойлаштириш орқали оммани огоҳликка чақириш режалаштирилаётганини қўшимча қилди.

«Дарё»нинг Telegram’даги расмий канали — @toshqindaryo’га аъзо бўлинг!