Ғалла майдонларидаги бегона ўтларга қарши кураш бу йил 144,2 минг гектар ерда бошоқли дон экинлари парваришлаётган воҳа деҳқонларининг бугунги кечиктириб бўлмас вазифаси. Бу каби курашга Махсус авиация ишлари авиакомпанияси Қарши бўлинмасининг ҳаво кемалари ҳам жалб этилди, деб хабар беради Қашқадарё вилояти матбуот хизмати.
«Вилоят агрокимёҳимоя бошқармаси билан тузилган шартномага мувофиқ, 7 та АН2 русумли самолётимиз ғалла майдонларига бегона ўтларга қарши ишлов беришда қатнашяпти. Ҳозирча 20 минг гектар майдонда ишловни авиация ёрдамида бажариш белгиланган бўлса, самолётларимиз қарийб шунча ғаллазорда гербицидларни сепиб бўлди. Яна 15 минг гектар майдон ишлови учун авиациядан фойдаланиш кўзда тутилаяпти», — дейди авиабўлинма қишлоқ хўжалиги авиацияси муҳандиси Шермат Назаров.
Бу йил ёғингарчиликнинг кўп бўлаётгани бошоқли дон экинлари майсаларининг тўлиқ ривожланиши, ўсувчанлигида муҳим аҳамият касб этди. Шу билан бирга, мавжуд қулай шароит бегона ўтларнинг авж олишига ҳам сабаб бўлади.
Ғаллазорларга кимёвий ишлов бериш, ўғитлаш каби агротехник тадбирларни ўтказишда махсус самолётлар кучидан фойдаланиш далага бошқа техника солиб, маданий экин майсаларини ҳам нобуд қилишнинг олдини олади.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)