Самарқанд шаҳрида умумий узунлиги 34,8 километрни ташкил этадиган трамвай йўллари босқичма-босқич қурилмоқда. Бу ҳақда «Ўзбекистон темир йўллари» компанияси ахборот хизмати маълум қилди.
Лойиҳанинг биринчи босқичида қурилаётган трамвай йўлининг умумий узунлиги 11,4 километрни ташкил этиб, бугунги кунда 7,2 километр бўлган трамвай йўлининг биринчи қисми қурилиши тўлиқ якунланди.
Ўзбекистон Президенти Шавкат Мирзиёэв вилоятда амалга оширилаётган бунёдкорлик ишлари, олиб борилаётган ислоҳотлар жараёни билан яқиндан танишиш мақсадида Самарқандга қилган ташрифи давомида, ушбу қурилган янги трамвай йўлини ҳам бориб кўрди.
Қурилишнинг кейинги қисми темирйўл вокзалидан Сиёб бозоригача бўлган йўналишда, яъни узунлиги 5 километр бўлган трамвай йўли қуриш ишлари давом этмоқда. Ушбу йўналишда 1 километр трамвай йўли қурилди ва Рудакий ҳамда Гагарин кўчалари кесишмасида трамвайларга техник хизмат кўрсатиш депоси бунёд қилинмоқда.
Трамвайларга электр энергияси етказиб беришда шаҳар аҳолиси ва корхоналарига етказиб берилаётган электр энергиясига салбий таъсир қилмаслигини таъминлаш учун 4 та махсус электр подстанциялари қурилди.
Янги трамвай йўналиши бўйича ҳаракат графиги ишлаб чиқилди. Унга кўра, трамвайлар эрталаб соат 6:00 дан кечқурун 23:00 гача ҳаракатланади. Темирйўл вокзалидан Саттепо массивигача трамвай линиясида икки томонлама 4 тадан жами 8 та трамвай ҳар 7 дақиқада ҳаракатланади. Трамвай йўлининг икки тарафидан автобус бекатлари билан бирлаштирилган 13 тадан жами 26 та замонавий бекатлар қурилган.
Лойиҳанинг кейинги босқичида қуриладиган трамвай йўлининг умумий узунлиги 23,4 километрни ташкил этиб, қурилиш «Самарқанд» темирйўл вокзалидан Спитамен кўчаси орқали Кимёгарлар шаҳарчаси ҳамда вокзалдан Нарпай кўчаси орқали Кимёгарлар шаҳарчасигача бўлган йўналишларни қамраб олади.
Янги трамвай йўлини қуриш баробарида, кадрлар масаласига ҳам алоҳида эътибор қаратилди. Айрим трамвай ҳайдовчилари илгари Тошкент шаҳрида ҳаракатланган трамвайларда фаолият кўрсатишган, яхши тажрибага эга. Улар билан биргаликда 20 нафардан ортиқ ёш трамвай ҳайдовчилар ҳамда трамвай линиясига хизмат қиладиган мутахассислар — жами 43 нафар фуқаро ишга қабул қилинди.
Ўзбекистон Ички ишлари вазирлигининг тегишли рухсатномаси олиниб, Самарқанд трамвай депоси қошида трамвай ҳайдовчиларини тайёрлаш маркази ташкил этилди.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)