Германия ҳукуматининг расмий вакили Штеффен Зайбертнинг маълум қилишича, расмий Берлин Оқ уй матбуот котиби Шон Спайсер томонидан Сурия президенти Башар Асаднинг Адольф Гитлерга қиёсланганини номақбул ҳаракат деб ҳисоблайди. Бу ҳақда «Газета.ru» хабар бермоқда.
«Исталган замонавий воқеа-ҳодисаларни нацистларнинг жиноятлари билан таққослаш яхши оқибатларга олиб келмайди. Бу номақбулдир», — деди Германия ҳукумати расмий вакили.
Аввалроқ Оқ уй расмий вакили Шон Спайсер Идлибда юз берган кимёвий ҳужум ҳақида фикр билдира туриб, Сурия президенти Башар Асадни нацистлар Германияси доҳийси Адольф Гитлер билан қиёслаган эди. Трампнинг матбуот котиби брифинг вақтида «ҳатто Гитлер ҳам кимёвий қуролни қўллашдек пасткашликка қўл урмагани»ни айтган.
Брифингдан сўнг журналистларнинг: «Нацистлар Германияси газ камераларидан фойдаланганидан хабарингиз борми?», — қабилидаги саволига Оқ уй матбуот котиби бу ҳақда билишини, бироқ у Гитлер кимёвий ҳужумни шаҳарларга нисбатан қўлламаганини назарда тутганини айтиб ўтган.
«Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)