Ўзбекистон божхоначилари яқинда бир неча қонунбузарлик ҳолатларида йирик миқдордаги рангли металл чиқиндиларининг олиб чиқилишининг олдини олди. Бу ҳақда Давлат божхона қўмитаси ахборот хизмати маълум қилди.
Наманган вилояти божхона бошқармаси ходимлари томонидан ҳуқуқни муҳофаза қилувчи бошқа идоралар вакиллари билан ҳамкорликда Уйчи туманининг қўшни давлатга туташ чегара олди ҳудудида ҳаракатланаётган, ушбу туманда истиқомат қилувчи А.Азизов бошқарувидаги ВАЗ-21011 русумли автомашина тўхтатилиб текширилганда, автомашинанинг ички салони ва юкхонасига яширин тарзда олиб чиқиш мақсадида10 та қопда салкам 0,5 тонна латун рангли металл парчалари ортилгани аниқланди.
Қашқадарё вилояти божхона бошқармаси ходимлари томонидан олиб борилган тезкор тадбирлар давомида Қарши шаҳрида ҳаракатланаётган Ford автотранспорт воситалари тўхтатилиб текширилганда, уларнинг бирида фуқаролар Ш.Ризоев ва Ф.Жабборовга тегишли қиймати 5 миллион сўмлан ортиқ 2,3 тонна мис ва латун рангли металл чиқиндилари ноқонуний равишда олиб кетилаётганлиги аниқланди.
Иккинчи Ford’га ҳам 1,8 тоннадан ортиқ мис ва латун рангли металл парчалари ортилган экан. Қиймати 5 миллион сўмдан ортиқ мазкур товар-моддий бойликлар фуқаро Ж.Жўраевга тегишли бўлиб чиқди.
«Фарғона» чегара-божхона пости орқали қўшни давлатга чиқиб кетаётган Н.Ҳомидов бошқарувидаги «Камаз» юк автомашинаси ўрнатилган тартибда божхона назоратидан ўтказилишдан аввал у йўловчи божхона декларациясида ҳам, божхона ходимларининг оғзаки сўрови пайтида ҳам ёнида ортиқча юклари йўқлигини маълум қилди.
Аммо божхона кўриги давомида ушбу автотранспорт воситаси юкхонасида кигиз ва ёғоч билан тўсилган яширин бўлма ташкил қилинганлиги ва унга 1,4 тонна 176 дона муқаддам фойдаланилган аккумулятор ортилганлиги аниқланди.
Худди шу усулни қўллаган фуқаро Б.Жўраев салкам 1, 9 тонна 172 дона, М.Таштанов эса салкам 160 килограмм 24 дона аккумулятор яширин равишда олиб чиқишга уринган пайтда божхоначилар томонидан тўхтатиб қолинди.
Ғиждувон туманида истиқомат қилувчи Ж.Фармоновнинг хонадони амалдаги тартибларга мувофиқ ва холислар иштирокида кўздан кечирилганда 1,7 тоннадан ортиқ рангли металл парчалари ноқонуний равишда сақлаб келинаётганлиги аниқланди.
Шунингдек, вилоят божхоначилари Р.Норов томонидан Isuzu юк автомашинасида ноқонуний равишда олиб кетилаётган 4,1 тоннага яқин рангли металл парчалари тўхтатиб қолди.
Ҳозирда мазкур ҳолатлар юзасидан божхона текширувлари ва суриштирув жараёнлари давом эттирилмоқда.
Маълумот учун, жорий йилнинг биринчи чораги мобайнида республика божхоначилари томонидан ҳуқуқни муҳофаза қилувчи бошқа идоралар вакиллари билан ҳамкорликда аниқланган 42 та қонунбузарлик ҳолатларида қиймати 52,5 миллион сўмлик 35 тоннадан ортиқ қора ва рангли металл парчаларининг ноқонуний айланмаси ва олиб ўтилишига чек қўйилди.
Изоҳ (0)