Равшан Ҳайдаров ва «Пахтакор» яна бирга. Колосовский ишдан олинди

Равшан Ҳайдаров «Пахтакор» бош мураббийи сифатида учинчи бор таништирилди. Бу ҳақда клуб матбуот хизмати хабар берди.

«Пахтакор» буни мавсум бошидаги қониқарсиз натижалар билан изоҳлади. 2-турда «Нефтчи» билан дуранг ўйнаган Тошкент клуби, кейинроқ ўз майдонида «Динамо»дан 0:1, Муборакда «Машъал»дан 0:3 ҳисобида енгилди. Сўнгги қоқилиш бош мураббий Григорий Колосовскийнинг истеъфоси билан якунига етди.

Янги бош мураббий Равшан Ҳайдаров «Пахтакор» учун бегона эмас. У 2006, 2007, 2010 ва 2011 йилги мавсумларда ҳам «Пахтакор»ни бошқарган ва икки мартадан Ўзбекистон чемпионати ва кубогида зафар қучган.

Маълумот учун, Қатарга қарши учрашувдан кейин Ўзбекистон миллий терма жамоаси бош мураббийи Самвел Бабаян «Пахтакор»ни танқид остига олиб, уч нафар футболчининг бош жамоага жароҳат билан етиб келганини қайд этганди. Кўп ўтмай, унинг термадаги ёрдамчиси Равшан Ҳайдаровга «Пахтакор», «Пахтакор»га эса Равшан Ҳайдаров насиб қилди.