Хонанда Ботир Яминов рухсатсиз 100 дан ортиқ мухлис тўплагани учун унинг клипи съёмкаси тўхтатиб қўйилди

Хонанда Ботир Яминов клип суратга олиш жараёнида муаммога дуч келди. Бу ҳақда унинг ўзи журналист Феруз Муҳаммадга қуйидагиларни маълум қилди.

«Mega Planet савдо мажмуасида ‘Билмади ёр’ деб номланган рақсбоп қўшиғимизга клип суратга олдик. Унинг ғоясидан келиб чиқиб, бир қатор саҳналар учун бизга кўпроқ мухлис керак эди. Режага кўра биз саҳна ясатиб, ҳеч бир тайёргарликсиз ўша ернинг ўзида қўшиқ айтишимиз, бунинг натижасида йиғилган мухлислар билан эса клип олишни режалаштирдик. Мақсадимиз — клипда тушаман деб олдиндан тайёрланган мухлислар билан эмас, шу ернинг ўзида жам бўлганлар билан клипни янада жонли қилиб суратга олиш эди».

Бироқ кутилмаганда мухлислар клип ижодкорларининг режасидан-да кўпайиб кетган ва улар саҳна атрофини ўраб олган. Тартиб-қоида бўйича эса камида юз кишини тўплаб концерт бериш учун хавфсизлик нуқтаи назаридан рухсат олиш керак.

«Бизнинг бундан хабаримиз йўқ эди — деб гапини давом эттирган Ботир Яминов. — Одамлар чинакам концерт деб ўйладими, хуллас, жуда кўпчилик йиғилди. Қўшиқни айтиб бўлиб, клипнинг съёмка ишларини бошлаган вақтимизда ички ишлар ходимлари келиб қолди. Улар жамоат жойида бунча одам билан клип съёмка қилишдан олдин рухсатнома олиш кераклигини тушунтиришди. Биз эса суратга олиш ишларини тўхтатишга, мухлисларни тарқатишга мажбур бўлдик».

«Бошқа куни эса ички ишлар ходимлари берган маслаҳатга амал қилган ҳолда рухсатнома олиб, сўнг ишни давом эттирдик. Ҳамкасбларимдан кимдир кун келиб оммавий саҳналардан иборат клип суратга олса, уларга олдиндан рухсат олишларини маслаҳат берардим. Агар ўзим бу ҳақда аввалроқ билганимда вақтимни ҳам, маблағни ҳам тежаган бўлардим».

«Дарё»нинг Telegram’даги расмий канали — @toshqindaryo’га аъзо бўлинг!