Самарқанд вилояти ҳокими Ҳиммат Оқбўтаев Пахтачи туманида сайёр қабул ўтказди. Пахтачи тумани қишлоқ хўжалик касб-ҳунар коллежи биносида бўлиб ўтган мулоқотда вилоят Халқ қабулхонаси мудири Ш.Узоқов, туман ҳокими К.Қурбонов ҳамда туман ташкилотлари раҳбарлари ва бошқа мутасаддилар қатнашди, дея хабар берди вилоят ҳокимлиги ахборот хизмати.
Тумандаги «Боғолони» маҳалласида яшовчи Ёвқоч Бойназаров ўз мурожаатида зовурлар қазилмаганлиги туфайли сув кўтарилиб, томорқаларда экин экишга халақит бераётганини айтган. «Амир Темур» маҳалласида истиқомат қилувчи Холиқул Раимқулов туман марказига элтувчи асосий йўлнинг носозлиги бўйича мурожаат қилди.
«Қилтамғали» маҳалласида тоза ичимлик суви муаммо. «Кештали» маҳалласида жойлашган боғча биноси таъмирталаб, спорт майдончалари йўқ. Ўн икки минг аҳоли истиқомат қилаётган «Сарой» маҳалласида ҳам муаммолар бир талай. Маҳалла ҳудудида фойдаланилмай бўш ётган бинолар бор.
Туман марказидан узоқ қишлоқларда тез ёрдам пунктларига эҳтиёж катта. Электр энергиясидаги узилишлар, симёғочларнинг эскирганлиги, уй-жой масаласида мурожаатлар қайд этилди.
Мулоқотда Пахтачи аҳолиси учун маиший газ баллонларини таъмирлаш масаласи долзарб муаммо бўлиб тургани таъкидланди. Аҳоли газ баллонларини Самарқанд шаҳрига келиб, таъмирлатишга мажбур бўлмоқда.
Вилоят ҳокимининг тумандаги сайёр қабули чоғида аҳолининг жойлардаги муаммолар, камчиликлар хусусидаги 30 дан зиёд мурожаати, таклифлари тингланиб, уларнинг ечими юзасидан вазифалар белгиланди. «Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)