2017 йил 13 март куни Германия Федератив Республикасининг Ўзбекистондаги элчихонасида бутун Ўзбекистон бўйича чет тили сифатида немис тилини ўрганадиган талабалар орасида ўнинчи маротаба нотиқлик танлови ўтказилди. Бу ҳақда Германиянинг Тошкентдаги элчихонаси матбуот хизмати «Дарё»га маълум қилди.
Жами 16 иштирокчи олийгоҳ ўз талабалари ўртасида немис тили бўйича ички танлов ўтказиб, Германия элчихонасида бўлиб ўтадиган якуний босқич учун биттадан вакилни аниқлаб берди.
Ҳар йили ўтказиладиган ушбу танловнинг мақсади Ўзбекистонда немис тили ўрганилишини қўллаб-қувватлашдан иборатдир. Бунда ёш нотиқлар олдиндан танлаб олинган маълум бир мавзу бўйича ўз нуқтайи назарларини тингловчилар қаршисида немис тилида ифодалаб бериши лозим.
Мусобақа доирасида якуний босқичга чиққан жами 16 нафар талабанинг тилни билиш даражаси, нотиқлик иқтидори, нутқнинг сифати ва ўзига хослиги ҳамда мавзунинг мазмунан очиб берилишига баҳо берилди.
Нотиқлик санъати бўйича жорий йилдаги танлов ғолиблигини Урганч Давлат университети талабаси Ирода Исмоилова қўлга киритди. Иккинчи ўринни Андижон Давлат университети талабаси Гулсанам Расулова эгаллади. Учинчи ўрин эса Жаҳон иқтисодиёти ва дипломатия университети талабаси Маҳкам Ҳамидов ва ЎзДЖТУ талабаси Барно Аҳмаджоновага насиб этди.
Жорий йилги мусобақада илк маротаба «Тингловчилар танлови» йўналиши киритилди ва ўз нутқини ажойиб тарзда талқин этган Ўзбекистон Миллий университети талабаси Регина Базикеева соврин билан тақдирланди. Танлов ғолиблари ва барча иштирокчилар немис тилидаги китоб ва аудио асарлардан иборат совғалар билан тақдирланди.
Изоҳ (0)