«Ўзбекистон темир йўллари» компанияси 2015 йил 6 ноябрида Испаниянинг Patentes Talgo компанияси билан яна иккита юқори тезликда ҳаракатланувчи электропоезд харид қилиш бўйича шартнома имзоланган эди. Ушбу замонавий электропоездларнинг дастлабкиси март ойи бошида Ўзбекистонга олиб келингани ҳақида аввал хабар берилган эди.
ЎзАнинг хабар беришича, Ўзбекистон Президенти Шавкат Мирзиёев Бухоро вилоятига ташрифи давомида янги «Афросиёб» электропоездининг имкониятлари, йўловчилар учун яратилган қулайликлар билан танишди.
Янги замонавий электропоезд олдингиларига қараганда кенг имкониятга эга. Хусусан, шу вақтга қадар ҳаракатланаётган юқори тезликдаги электропоездлар 215 йўловчи сиғимига эга бўлиб, иккита VIP, иккита «бизнес» ва иккита «эконом» тоифали вагонлардан иборат. Янги поезд 287 йўловчи сиғимига эга. Унда «эконом» тоифали вагонлар сони иккита кўп.
«Тез кунларда замонавий электропоезднинг иккинчиси ҳам олиб келинади. Поездлар ҳаракатини йўлга қўйиш баробарида қўшимча иш ўринлари яратилиб, 15 машинист ва 50 га яқин вагон кузатувчисини иш билан таъминлаш кўзда тутилган», — дейилади ЎзА ахборотида.
«Ўзтемирйўлмаштаъмир» шўъба корхонаси ҳудудида юқори тезликда ҳаракатланувчи электропоездларга хизмат кўрсатиш цехи қурилмоқда. ЎзАнинг қайд этишича, бу ҳам янги иш ўринларини кўпайтириш имконини беради. «Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)