Тошкент шаҳар божхона бошқармаси ходимлари «Сергели» ташқи иқтисодий фаолият божхона постида олиб кирилган товар-моддий бойликлар учун давлат бюджетига ундириладиган божхона тўловларидан бўйин товлаш мақсадида содир этилган навбатдаги найрангни фош этди. Бу ҳақда «Дарё»га бошқарма ахборот хизмати хабар берди.
Наманган вилоятида рўйхатдан ўтган M.G МЧЖ вакиллари ушбу жамият номига Жанубий Кореядан юборилган умумий қиймати 1 миллиард 107 миллион сўмлик 320 минг донадан ортиқ бир марталик устараларни божхона юк декларациясида устара учун тиғ сифатида қайд қилгани аниқланди.
Экспертиза жараёнида маълум бўлишича, уддабуронлар божхоначилар кўзини шамғалат қилиш мақсадида ушбу товарларга тегишли юк-кузатув ҳужжатларидаги ёзувларни ҳам ўзгартирган. Бу ҳам етмаганидек, жамият суриштирувлар давомида божхоначиларга қалбаки лицензияни тақдим қилган.
Шу тариқа сохта тадбиркорлар мазкур товарга тегишли ҳақиқий ташқи иқтисодий фаолият товар номенклатура кодларини бошқасига ўзгартириш орқали давлат бюджетига аслида ундирилиши лозим бўлган тахминан 800 миллион сўмлик божхона тўловларидан бўйин товлаган.
Жамият мансабдор шахсларига нисбатан жиноий иш қўзғатилди. «Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)