Фарғона вилояти божхона бошқармаси ходимлари Қувасой шаҳрининг чегарадош ҳудудида Lacetti, Nexia ва 2 та Spark автомашиналарини тўхтатиб текширишганида дастлаб юк эгалари Л.Мамажонов, А.Сатторов, Ж.Холиқов, И.Юсупов воқеа жойидан қочиб, яширинди. Бу ҳақда «Дарё»га бошқарма ахборот хизмати маълум қилди.
Тезкор тадбир давомида уларнинг шахси аниқланиб, қўлга олинди.
Автомашиналар салони ва юкхонаси, шунингдек, ушбу қишлоқда истиқомат қилувчи Э.Охуновнинг хонадони холислар иштирокида кўздан кечирилганида, қонунбузарлар божхона назоратини четлаб ўтиб, айланма йўллар орқали қиймати 38,5 миллион сўмлик хорижда ишлаб чиқарилган 17 минг донадан ортиқ электр лампочкаларини ноқонуний олиб киришга уринишгани фош бўлди.
Мазкур электр чўғланма лампочкаларининг қуввати 100 ва 150 ватт бўлиб, Вазирлар Маҳкамасининг «Энергияни тежайдиган лампалар маҳаллий ишлаб чиқарилишини кенгайтириш чора-тадбирлари тўғрисида»ги қарори талабларига биноан 2017 йилнинг 1 январидан бошлаб уларни реализация қилиш тақиқланган.
Мазкур ҳолат юзасидан божхона текширувлари ва суриштирув жараёни давом этмоқда. «Дарё»нинг Telegram’даги расмий канали — @toshqindaryo’га аъзо бўлинг!
Изоҳ (0)