Францияда браконьерлар ҳайвонот боғига кириб, оқ каркидонни ўлдириб кетди

Номаълум жиноятчилар Франциядаги Туари ҳайвонот боғига кириб, каркидонни ўлдирди ва шохини қирқиб, яширинди. Бу ҳақда «РИА Новости» хабар бермоқда.

Ҳайвонот боғига икки йил аввал келтирилган Винс лақабли 4 ёшли навқирон (каркидонлар ўртача 40—50 йил яшайди) жонивор браконьерлар қурбони бўлди.

«Улар Винсни отиб ташлади ва шохларидан бирини арралаб олади. Иккинчи шохда фақат арра излари бор. Бундан жиноятчиларни кимдир чўчитгани ёки арра синиб қолганини тахмин этиш мумкин», — дейилади ҳайвонот боғи маъмурияти хабарида.

Ўлдирилган жониворга эртасига эрталаб унга қарайдиган ҳайвонот боғи ходимаси дуч келди. Икки бошқа оқ каркидон — 37 ёшли Грейси ва 5 ёшли Бруно жабрланмаган.