Қозоғистон президенти мамлакат конституциясига тузатишлар киритиш бўйича референдум ўтказишга зарурат сезмаётганлигини билдирди. Бу ҳақда Kazakhstan Today хабар бермоқда.
«Конституцияда мамлакат асосий қонуни ўзгартирилишининг икки варианти белгилаб қўйилган. Президент муҳокамалардан сўнг ҳужжатни референдумга қўйиши ёки парламентга юбориши мумкин. Биз илгари сураётган ислоҳотларда давлат ва ҳокимият тизими асослари ўзгармаётганлиги, инсон ҳуқуқлари ва эркинликлари чекланмаётганлигини инобатга олиб, катта харажатларга йўл қўйиш, одамларни овора қилишнинг ҳожати йўқ. Шунинг учун иккинчи вариантни танлашга қарор қилдим», — дея таъкидлади Нурсултон Назарбоев парламент палаталари қўшма йиғилишидаги чиқиши чоғида.
Қозоғистон президенти депутатлардан қонун лойиҳасини имкон борича кейинга сурмай, белгиланган тамойилларга таянган ҳолда кўриб чиқишга чақирди.