Суриялик операторга «Оскар» маросимида қатнашиш учун АҚШга киришга рухсат беришмади

Суриялик оператор Холид Хатибни муддати тугамаган визаси бўлишига қарамай, маросимда қатнашиш учун АҚШга киришга қўйишмади, деб ёзади TJournal. У «Оскар» мукофотига номзод қилиб кўрсатилган «Оқ дубулғалар» (White Helmets) қисқа метражни ҳужжатли фильмининг катта қисмини суратга олган.

Associated Press агентлиги журналистлари маълумотларига кўра, АҚШ ички хавфсизлик вазирлиги кинематографистнинг киришини тақиқлашга сўнгги лаҳзада қарор қилган. Вазирликнинг ички ҳужжатларида айтилишича, тақиққа Хатибга нисбатан топилган аллақандай «обрўсизлантирувчи ахборот» сабаб бўлган. Таъкидланишича, бундай таъриф унинг террорчилар билан алоқалари ёки паспорти билан боғлиқ муаммоларини ҳам билдириши мумкин.

АҚШ ички хавфсизлик вазирлиги вакиллари журналистларнинг сўровларига жавобан, «АҚШга сафар қилиш учун амал қилувчи чиқиш паспортига эга бўлиш кераклиги»ни таъкидлашди.

Хатибнинг ўзи эса Twitter’да қизғин иш туфайли «Оскар»да қатнаша олмаслигини маълум қилди.