Ҳар бир қитъада ўзига хос жойлар бор. Уларнинг баъзилари ўз гўзаллиги билан мафтун қилса, бошқалари эса ўлимга олиб келувчи хавфга эга ва, устига-устак, ташриф буюриш учун тақиқланган.
Шамол учириб кетиши мумкин бўлган жой
Сайёрадаги энг хавфли жойлардан бири сифатида АҚШнинг Нью-Гемшир штатидаги Вашингтон тоғи тан олинган. Бу ерда 1934 йилда шамолнинг Ер юзасидаги рекорд даражали тезлиги қайд этилган — соатига 372 километр! Бу ерда шамол йил бўйи кунига ўртача 16 соатдан эсади. Шиддатли шамол одамни ерга қулатиши мумкин. Бундан ташқари, бу жойнинг яна бир ўзига хослиги — ҳаво ҳарорати -40 даражагача ҳам тушиб кетиши мумкин.Куйиб кетиш мумкин бўлган жой
Африка қитъасидаги Эфиопия давлати шимолида Данакиль деб номланувчи чўл бор, уни Ердаги дўзах деб ҳам аташади. Гап шундаки, бу ерда ҳаво 50, баъзан 60 даражагача, ер эса 70 даражагача қизиб кетиши мумкин. Бундан ташқари, саҳро ҳудудида кўплаб вулқонлар бўлиб, улар вақти-вақти билан оёқ остидан қайнаб чиқади, шу туфайли, бу ерда қум устида юраётиб, куйиб кетиш ҳеч гапмас. Вулқонлар ҳосил қилган даралардан заҳарли буғлар чиқади, олтингугурт кислотаси ва газдан иборат кўллар ҳам мўл.Данакилнинг Араб тектоник плитаси дарз кетган ерда жойлашгани буларнинг барчасига сабабчидир. Бу ерда ҳалок бўлиш ёки газлардан заҳарланиб, соғлиқни йўқотиш турган гап.
Ташриф буюриш тақиқланган жой
Сайёрадаги энг хавфли жой эса Кеймада-Гранди ёки Илонлар ороли ҳисобланади. У ҳатто ташриф буюрувчилар учун ёпиб қўйилган.Атлантика океанида жойлашган орол илонларга тўлиб-тошган: баъзи маълумотларга кўра, бир квадрат метр майдонга биттадан бештагача судралиб юрувчи тўғри келади. Бунинг устига бу ерда энг хавфли илонлардан бири — орол ботропси яшайди. У жуда қисқа вақт ичида ўлдиришга қодир, чунки унинг заҳри тананинг тезликда жонсизланишига олиб келади.
Илонларни оролнинг ҳамма жойида учратиш мумкин: улар ерда ўрмалайди, дарахт шохларида осилиб ётади ёки буталар соясига яширинади. Улар асосан, ҳеч нарсадан гумон қилмай, дарахт шохига қўнадиган қушлар билан озиқланади.
Изоҳ (0)