Ўзбекистонлик киноижодкорлар Морган Фриман «ўйнаган» фильм тақдимоти тўхтатилгани учун миннатдорчилик билдирди

Рекламасида Голливуд актёри Морган Фриманнинг сиймосидан фойдалангани учун ўзбекистонлик режиссёр Сирож Абдуллаевнинг «Дайди» номли фильми тақдимоти «Ўзбеккино» миллий агентлиги томонидан тўхтатиб қўйилган эди.

«Ўзбеккино»нинг бу қарорини ўзбекистонлик бир гуруҳ киноижодкорлар қўллаб-қувватлаган. Уларнинг миннатдорчилик мурожаатини режиссёр Акбар Бектурдиев Facebook’даги саҳифасида эълон қилган.

Мурожаат остида режиссёрлар Мансур Абдухолиқов, Дилмурод Масаидов, Мухлиса Азизова, Акбар Бектурдиев, продюсер Ойбек Абдушукуров, оператор Дилмурод Турдибоев, рассом Бектош Ражабов, монтаж режиссёри Хуршид Алихўжаев кабилар имзо чеккан.

Сўнгги кунларда «Дайди» фильмининг рекламасини кўриб, очиғи, ҳайрон бўлган эдик — наҳотки ўғрилик билан ҳам кино ишласа ва одамларни осонгина алдаш мумкин бўлса, деб.

Битта хорижлик киноактёрни лойиҳамизга жалб қилиш учун қанча елиб югурамиз, қанча машаққат чекамиз. Чунки биз эҳтиётсизлик қилсак, муаллифлик ҳуқуқи бўйича халқаро жанжал келиб чиқиши, ҳукуматимизга турли ноталар юборилиши мумкин ва раҳбарлар олдида юзимиз ерга қараб қолишини истамаймиз.

Бундан ташқари, ҳозирда ижтимоий тармоқлар йирик медиа майдон ҳисобланишини инобатга олсак, бу ҳодиса нафақат ўзбек киноси, балки Ўзбекистон имиджи учун ҳам салбий таъсир ўтказиши мумкин эди, деб ҳисоблаймиз.

Шу сабабли, биз, киноижодкорлар мазкур қарори учун «Ўзбеккино»га миннатдорчилик билдирамиз. Ҳамкасбимиз томонидан йўл қўйилган хатолар эса тез орада тўғриланиши ва «Дайди» фильми катта экранларда ўз мухлисини топишига ишонч билдирамиз.

Ўзбекистонлик бир гуруҳ киноижодкорлар мурожаатидан