2017 йилнинг 11 февралида Ўзбекистон кинотеатрлари экранларига чиқиши кутилган Сирож Абдуллаев режиссёрлигида суратга олинган «Дайди» фильми премьераси тўхтатиб қўйилди. Бунга асосий сабаб «ТИМУР ФИЛЬМ» МЧЖ томонидан суратга олинган бадиий фильмнинг жамоатчилик орасида тарғибот қилишда бир қатор қонунбузарлик ҳолатларига йўл қўйилганлиги бўлди. Бу ҳақда «Ўзбеккино» Миллий агентлиги матбуот хизмати маълум қилди.
Фильмнинг трейлерларидан бири 2017 йилнинг 21 январида «Mover» видеохостингига жойлаштирилган эди.
Фильмнинг трейлерида машҳур киноактёр Морган Фриманнинг Буюк Британия ва Жанубий Кореялик киноижодкорлар томонидан 2014 йилда ишлаб чиқарилган Last Knights («Сўнгги рицарлар») фильмида суратга тушгандаги қиёфаси акс эттирилган. Аммо Голливуд актёри Сирож Абдуллаевнинг ушбу фильмида иштирок этмаган.
Фильм ижодкорлари томошабинларнинг фильмга нисбатан қизиқиши ва талабини кучайтириш мақсадида машҳур кино юлдузини фильмда суратга тушганлигини билдирувчи ёлғон (чалғитувчи) маълумотлар тарқатиб, истеъмолчиларнинг (томошабинлар) ҳуқуқларини поймол қилган.
Ўзбекистон Республикасининг «Истеъмолчиларнинг ҳуқуқларини ҳимоя қилиш тўғрисида»ги Қонуни 6-моддаси талабига кўра ишлаб чиқарувчи истеъмолчига ўзи реализация қилаётган товарлар ҳақида ўз вақтида зарур, тўғри ва тушунарли маълумот бериши шарт. Қонуннинг 23-моддасида давлат истеъмолчиларнинг товар сотиб олиши ва ундан фойдаланиш чоғидаги ҳуқуқлари ҳамда қонун билан қўриқланадиган манфаатларини ҳимоя қилиши белгиланган.
Матбуот хизматининг таъкидлашича, «ТИМУР ФИЛЬМ» МЧЖ студияси «Дайди» фильмида бир қатор хорижий фильмлардаги кадрлардан фойдаланиб, Ўзбекистон Республикасининг «Муаллифлик ҳуқуқи ва турдош ҳуқуқлар тўғрисида»ги Қонуни 19-моддаси талабини бузган. Ваҳоланки, Қонуннинг ушбу моддасига кўра, юридик ва жисмоний шахслар муайян асардан фақат ҳуқуқ эгаси ёки бошқа ваколатли шахс билан тузилган шартномага биноан фойдаланишлари мумкинлиги белгиланган.
Шулардан келиб чиқиб, ушбу ҳолатлар бўйича Хусусийлаштириш, монополиядан чиқариш ва рақобатни ривожлантириш давлат қўмитасига ҳамда Интеллектуал мулк агентлигига расмий тақдимнома киритилди.
Қайд этилган масалалар мазкур давлат идоралари томонидан кўриб чиқилгунига қадар «Дайди» фильмини кинотеатрларда тақдимотини ўтказиш ва кенг намойиш қилишни тўхтатиб туриш кўрсатмаси берилди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)