Россиялик таниқли кино ва театр актёри, режиссёр, «Бригада», «Жмурки», «Остров» каби сериал ва фильмларда бош қаҳрамон образини яратган Дмитрий Дюжев Тошкентга келгани ҳақида аввал ҳам хабар берган эдик.
Дмитрий Дюжев ўзбекистонлик санъаткорлар — Раъно Шодиева ва Карим Мирҳодиев билан бирга Ўзбекистон давлат санъат ва маданият институтининг биринчи босқич талабаси Мухлиса Азизованинг ишчи номи «У» («Она») бўлган фильмида суратга тушди.
HD CINEMA кинокомпанияси янги фильмни суратга олиш учун Ўзбекистон илмий-оммабоп ва ҳужжатли фильмлар киностудияси павилёнида махсус декорация ҳозирлади. 54 кишидан иборат катта жамоа икки кун мобайнида фильмни суратга олиб бўлди.
Фильмнинг лойиҳа ва ғоя муаллифи — Абдужамил Содиқов, сценарий муаллифлари — Дилмурод Масаидов, Мансур Васати, оператор — Дилмурод Турдибоев, продюсер — Ойбек Абдушукуров. Овозлаштириш ва монтаж ишлари Москвада амалга оширилиши кутилмоқда.
Дмитрий Дюжев фильм сценарийси, мавзусидан тортиб, ижодий жамоанинг фаоллиги, юқори даражадаги ташкилотчилик ишларигача барини алоҳида эътироф этди.
«У» ҳақида маълумот олиш мақсадида журналист Феруз Муҳаммад фильм режиссёри Мухлиса Азизова билан қисқа суҳбат уюштирди. Қайд этиш жоиз, Мухлиса Азизова «Геолог: Ўлимдан кучли» фильмида лойиҳа муаллифи, «Тинчлик соҳили» номли қисқа метражли фильмда эса постановкачи режиссёр сифатида қатнашган.
— «У» қисқа метражли фильмида айнан Дмитрий Дюжев, Раъно Шодиева ҳамда Карим Мирҳодиевдан иборат актёрлар жамоасидан фойдаланиш сабаб не?— Фильм сценарийсига кўра, бош қаҳрамон эркак 40—42 ёш, аёл эса 35—38 ёш оралиғида бўлиши керак. Тасаввуримизда гавдаланган персонажларга шу санъаткорлар мос тушгани боис уларни танладик. Фильм сценарийси уларга маъқул бўлди ва улар фильмда рол ижро қилишга розилик билдирди.
— Фильм қачон мухлислар эътиборига ҳавола қилинади?— Чамаси бир ойларда фильмни тайёрлаб бўламиз. Ижодимиз маҳсулини дастлаб халқаро кинофестиваллар кўригига топширамиз, кейинроқ эса миллий телеканалларимиз орқали намойишга қўйишни режалаштирганмиз.
— Бу фильм билан қайси кинофестивалларда қатнашмоқчисиз?— Биз бу фильмни, аввало, халқаро кинофестиваллар учун мўлжаллаб суратга оляпмиз, бу танловларнинг талабига кўра, қисқа метражли фильмнинг давомийлиги 14 дақиқа ва 49 сониядан ошмаслиги керак. Асосий мақсад — Канн кинофестивалида қатнашиш. Бу — жаҳон бўйича мингдан ортиқ қисқа метражли фильмлар қатнашадиган, рақобат жуда катта бўлган танловдир. Фильмимиз шу фестивалга қабул қилинса, мендан бахтли инсон бўлмас эди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)