NASA тадқиқотчилари Венера юзасида баланд ҳарорат ва атмосфера босимини кўтара оладиган электрон-ҳисоблаш қурилмасини ишлаб чиқди. Муҳандислар у Ерга энг яқин сайёрага 2023 йилда жўнатиладиган роверда қўлланилишини тахмин этмоқда, деб ёзади Gizmodo.
Венера юзасидаги ҳарорат Цельсий бўйича қарийб 500 даражага тенг. Бундан ташқари, атмосфера зичлиги сув зичлигидан атиги 15 марта камроқ, холос. Буларнинг барчаси астронавтларнинг Венерага ташрифига тўсқинлик қилиши билан бирга, учувчисиз тадқиқот қурилмалари ишига ҳам халал беради, улар бундай оғир шароитларда икки соатдан узоқроққа чидаб бера олмаган.
NASA олимлари тайёрлаган компьютер чипи кремнийдан эмас, кремнийнинг углерод билан бирикмасидан ташкил топган. Янги материал юқори ҳароратда металларнинг ярим ўтказувчанлик хусусиятларини сақлаш имконини беради. Оддий кремнийдан ясалган чип бундай хусусиятларини йўқотади, натижада транзисторлар ишламай қўяди. Бундан ташқари, тадқиқотчилар схема компонентларини бирлаштириш учун тантал силицидидан фойдаланди.
Чип Венерадаги шароитларни такрорловчи симуляторда синаб кўрилди. Схема 21 кундан ортиқроқ вақт давомида ишлай олди.
Олимлар таъкидлашича, уларнинг чипи ҳозирча фақат 24 та транзистордан иборат, бу қурилмани бошқариш учун зарур бўлган замонавий компьютер учун жуда кам ҳисобланади. Бундан ташқари, баланд ҳарорат ва босимга чидамли бўлган ровернинг конструкциясини ҳам ўйлаб топиш керак.
Изоҳ (0)