Normaтив-ҳуқуқий ҳужжатлар муҳокамаси порталида Вазирлар Маҳкамасининг «Шахсий ёрдамчи ва деҳқон хўжаликлари фаолиятини янада ривожлантириш бўйича қўшимча чора-тадбирлар тўғрисида»ги қарори лойиҳаси жойлаштирилди. Бу ҳақда Norma хабар бермоқда.
Қарорда ажратилган ер майдонларидан янада самарали фойдаланиш, озиқ-овқат маҳсулотлари ишлаб чиқариш ва уларни экспорт қилиш ҳажмларини кескин ошириш, аҳоли бандлигини таъминлаш ва даромадларини кўпайтириш мақсадида шахсий ёрдамчи ва деҳқон хўжаликларида 2017-2019 йилларда қўшимча равишда паррандачилик ва цитрус (лимон) маҳсулотларини етиштиришни ташкил этиш юзасидан чора-тадбирлар Дастурини қабул қилиш кўзда тутилмоқда.
Қарорга мувофиқ, маҳаллий шароитдан келиб чиқиб, ҳар бир ҳудудда (аҳоли пунктида) агрофирмалар ташкил этилади. Уларга буюртманомаларга мувофиқ цитрус (асосан лимон) ўсимликлари учун иссиқхоналар ва парранда қафасларини марказлашган ҳолда қуриб бериш ҳамда тайёр ҳолда хонадон эгаларига топшириш, цитрус ўсимликлар кўчатларини олиб келиб экиб бериш, паррандалар ва бошқа зарурий моддий-техника ресурсларини етказиб бериш, шахсий ёрдамчи, деҳқон (фермер) хўжаликларида етиштирилаётган қишлоқ хўжалиги маҳсулотлари, шу жумладан, цитрус ва парранада маҳсулотларини ҳарид қилиш, тайёрлаш, қайта ишлаш, сотиш ва экспорт қилиш ҳуқуқи берилади.
Ташкил этиладиган агрофирмаларга ҳудуддаги мева-сабзавотларни қайта ишлаш корхоналари, кўп тармоқли фермер хўжаликлари, паррандачилик корхоналари ва бошқа йирик корхона ҳамда ташкилотлар таъсисчи сифатида киритилиши тавсия этилган.
Шахсий ёрдамчи ва деҳқон хўжаликларида юқорида кўрсатилган фаолият турлари билан 4 миллион 200 мингдан ортиқ оила шуғулланиши, 3 йил давомида 10 мингдан ортиқ цитрус (лимон) ва 85 минг бош парранда етказиб берилиши кўзда тутилмоқда.
Агрофирмалар, шахсий ёрдамчи ва деҳқон хўжаликларига иссиқхоналар қуриш учун Ўзбекистон Республикаси Марказий банкининг қайта молиялаштириш ставкасидан ошмаган фоизларда 5 йил муддатга (3 йиллик имтиёзли давр), парранда боқишни ташкил этиш учун 3 йил муддатга (1 йиллик имтиёзли давр) кредит маблағлари расмийлаштириб берилиши белгиланган.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)