АҚШда қатор мусулмон мамлакатларга нисбатан виза талаблари бир ойдан кейин қатъийлаштирилиши мумкинлигини айтишди

АҚШ ҳукумати аҳолисининг асосий қисми мусулмонлардан иборат бўлган қатор давлатларга нисбатан виза талаблари бир ой ичидаёқ қатъийлаштирилиши мумкинлигини истисно қилмаяпти. Бундай огоҳлантириш АҚШ миллий хавфсизлик вазирлиги тарқатган ёзма баёнотдан ўрин олди, деб ёзади «ТАСС».

Мазкур ҳужжатда таъкидланишича, АҚШга киришга вақтинчалик тақиқ фақат Ироқ, Эрон, Яман, Ливия, Сурия, Сомали ва Суданга нисбатан амал қилади. «Бошқа ҳеч қайси мамлакат бунга дуч келмайди», — дейилади баёнотда. Шунингдек, ушбу босқичда Вашингтонда фуқароларини АҚШга киритмасликка қарор қилинган давлатлар рўйхатини кенгайтириш нияти йўқ.

Айни пайтда вазирлик, давлат департаменти, миллий разведка директори аппарати юқорида санаб ўтилган давлатлар Вашингтонга Америка визаларини олишга интилаётган фуқаролари ҳақида етарлича маълумот узатаётгани юзасидан текширув олиб бормоқда. Текширув натижалари президент Дональд Трампга етказилади. Бу Трамп етти мамлакат фуқароларининг АҚШга киришини тақиқловчи фармонни имзолаган кундан (27 январь) бошлаб 30 кун ичида амалга ошиши керак.

Ўз фуқаролари ҳақида зарур маълумотни тақдим этмаётганлиги аниқланган мамлакатлардан бундай ахборотни 60 кун ичида тақдим этишни бошлаш сўралади.

Аввалроқ Американинг Сиэтл шаҳридаги Федерал суд АҚШ президенти Дональд Трампнинг иммиграция режимини қатъийлаштиришга қаратилган фармони бажарилишига вақтинчалик тақиқ қўйган эди.