Мақсадларни тўғри қўйиш ва уларга эришиш бахтли ҳаёт гаровидир. Бироқ ҳар доим ҳам интилаётган нарсаларимизни тўғри ифодалай олмаймиз. Бу эса орзуларнинг орзулигича қолиб кетишига олиб келади. Мақсадларга эришиш сири нимада?
Фақат ўзингиз ва ўз имкониятларингизга таянинг
Олдингизга бирор мақсад қўйишдан аввал уни амалга ошириш бўйича барча жавобгарлик ўз зиммангизда эканлигини эсдан чиқарманг. Муваффақиятсизликда бошқа кишини айбламаслик учун бошқаларнинг ёрдамисиз эришиш мумкин бўлган мақсадларни ўз олдингизга қўйинг.
Мақсадларни тўғри шакллантиринг
Мақсадларни худди ғоялар каби қоғозга (ён дафтар, кундалик) ёзиб қўйиш керак. Батафсил ёзиб чиқилган мақсаднинг амалга ошиш эҳтимоли кўпроқдир. Агар мақсадларингизни қоғозга ёзмасдан ҳам хотирангизда сақлашга ишонсангиз, уларга эришишга ҳам катта умид қилманг. Уларни орзулар сафига киритиб қўйишингиз мумкин.
Инкор шаклидан фойдаланманг
Мақсадни тўғри қўйиш ва шакллантириш учун у ижобий қувват улашиши лозим. Шунинг учун нимани истамаслигингиз эмас, нималарни хоҳлаётганлигингизни аниқлаб олинг.
Тўғри мақсад — «Бой бўлиш», «Хушбичим қоматга эга бўлиш». Нотўғри мақсад — «Камбағал бўлмаслик», «Ортиқча вазндан қутулиш».
Катта мақсадларни қисмларга ажратинг
Ҳар қандай катта мақсад уни қисмларга ажратгунингизга қадар чиқиш қийин бўлган тоғдек кўринади. Масалан, чет элдан кўчмас мулк харид қилиш бир қарашда амалга ошириш имконсиз истакдек кўринади. Бироқ мақсадни босқичларга бўлиб, унга томон мунтазам қадамлар билан ҳаракат қилинса, унга эришиш осонлашади. Дастлаб ойига муайян маблағни ишлаб топиш мақсадини қўйиш мумкин. Сўнгра мазкур маблағнинг ўн фоизи, кейинроқ 20 фоизини четга олиб қўйишни режалаштириш мумкин. Эртами-кечми сиз зарур маблағни тўплашга эришасиз.
Изоҳ (0)