Google собиқ вице-президенти саломатлиги билан боғлиқ муаммолар туфайли Xiaomi’ни тарк этади

Хитойнинг смартфон ишлаб чиқарувчи Xiaomi компаниясининг халқаро ҳамкорлик бўйича вице-президенти Хьюго Барра саломатлиги билан боғлиқ муаммолар туфайли тез орада компанияни тарк этади, деб ёзади «ТАСС». У брендни дунё бозорида илгари суриш билан шуғулланган.

Ўзининг Facebook’даги саҳифасида Барра Xiaomi мухлислари ҳамда ўз ҳамкасбларига 3,5 йиллик ҳамкорликдаги иш учун миннатдорлик билдирди.

Топ-менежернинг сўзларига кўра, у «дўстлари ва оиласига яқин бўлиш учун» Сан-Францискодаги Кремний водийсига қайтмоқчи. Барра у ерда янги лойиҳа устида иш бошлашини айтди, аммо бу борада ҳеч қандай тафсилотларни келтирмади.

Хьюго Барра 2008 йилдан Google Mobile’да ишлаган, 2010 йилда эса Android операцион тизими учун масъул бўлган бўлинмага ўтган. 2012—2013 йилларда Google вице-президенти лавозимида ишлаган. 2013 йил сентябрида эса у Xiaomi’даги худди шундай лавозимга ўтган.