Австралияда хип-хоп клипнинг отишма саҳнасини суратга олиш вақтида актёр ҳалок бўлди

Австралиялик актёр маҳаллий Bliss n Eso хип-хоп гуруҳининг клипини суратга олиш жараёнида ҳалок бўлди. TJournal’нинг ёзишича, клипда бардаги отишма саҳнаси бор эди.

Маҳаллий полиция бўлинмасидан маълум қилишларича, жароҳатланиш эҳтимоли мавжуд бўлган саҳналарни суратга олиш жараёнида гуруҳ хонандаларининг ўзи иштирок этмаган, бу саҳналар алоҳида суратга олинган.

Клип учун бардаги қуролли отишма саҳнасини суратга олиш кўзда тутилган эди. Тасвирга олиш вақтида актёрлардан бири ўқотар қуролнинг отишидан сўнг кўкрагидан яраланиб, вафот этган.

Ҳозирги вақтда полиция қурол жанговар патрон билан ўқланганмиди ёки яқин масофадан отганда ҳам жароҳат етказиши мумкин бўлган бўш патрон билан ўқланганмиди — шуни аниқлаш устида ишламоқда.

Ҳуқуқни муҳофаза қилиш органларидан маълум қилишларича, актёрнинг ўлими «ишлаб чиқариш жараёнидаги жароҳат» ҳисобланади. Тасвирга олиш гуруҳи ҳодиса юзасидан олиб борилаётган тергов ҳаракатларида полиция билан ҳамкорлик қилмоқда.

Қотиллик юз берган Brooklyn Standard бари эгаларининг таъкидлашича, иншоот бутун бир кун учун ижарага берилган бўлиб, тасвирга олиш ишларида бар ходимларидан ҳеч бири қатнашмаган.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.