«Манчестер Юнайтед» ҳужумчиси Уэйн Руни «Сток Сити»га қарши (1:1) АПЛ 22-тур ўйинининг сўнгги дақиқаларида жаримадан гол киритиб, клуб учун урган голлари сонини 250 тага етказди ва «МЮ» тарихидаги энг яхши тўпурарга айланди.
Бу кўрсаткич бўйича Руни манкунианлар афсонаси сэр Бобби Чарлтоннинг (249 та гол) ўтган асрнинг 70 йилларидан буён сақланиб келинаётган рекордини янгилади.
Уэйн Руни 2004 йили «Эвертон» клубидан «МЮ» сафига келиб қўшилганди. Шу кунгача у «қизил иблислар» сафида барча турнирларда 546 ўйин ўтказиб, 250 та голга муаллифлик қилди.
31 ёшли футболчи, шунингдек, АПЛнинг сафар ўйинларида энг кўп гол киритган футболчига айланди. Руни меҳмонда ўтказилган ўйинларда жами 88 та гол уриб, «Ньюкасл» афсонаси Алан Ширерга тегишли бўлган рекордни ўзиники қилиб олди.
Руни АПЛ тарихидаги энг яхши тўпурарлар рўйхатида «Блекберн» ва «Ньюкасл» собиқ ҳужумчиси Алан Ширердан кейин иккинчи ўринда бормоқда. «МЮ» ҳужумчиси Премьер-лигада жами 195 та гол киритган, Ширер ҳисобида эса 260 та гол мавжуд.
Бундан ташқари, Уэйн Руни Англия терма жамоасининг тарихдаги энг яхши тўпурари саналади. У мамлакат термаси сафида 119 учрашув ўтказиб, 53 та голга муаллифлик қилган.
«МЮ» тарихидаги энг яхши тўпурарлар (барча турнирлар инобатга олинган):
1. Уэйн Руни – 250 та гол, 546 ўйин (2004 йилдан ҳозирги вақтгача);
2. Бобби Чарлтон – 249 та гол, 748 ўйин (1956–1973 йиллар);
3. Денис Лоу – 237 та гол, 404 ўйин (1962–1973 йиллар);
4. Жек Роули – 211 та гол, 424 ўйин (1937–1955 йиллар);
5–6. Деннис Вайоллет – 179 та гол, 293 ўйин (1953–1962 йиллар);
5–6. Жорж Бест – 179 та гол, 470 ўйин (1963–1974 йиллар).
Маълумот учун, Уэйн Руни «МЮ» сафида 5 карра Англия чемпиони, 4 карра Англия Суперкубоги, икки марта Англия Лига Кубоги ва бир мартадан Англия Кубоги ва ЕЧЛ ғолиби бўлган.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)