ОАВ: Facebook Германиядаги сайловлар арафасида янгиликлар фильтрини ишга туширади

Facebook яқин ҳафталар ичида ишга тушадиган махсус фильтр ёрдамида янгиликларнинг ишончлилигини текширишни режалаштирмоқда, деб ёзади TJournal.

The Financial Times хабарига кўра, ижтимоий тармоқ Германияда 2017 йилнинг август ёки сентябрида бўлиб ўтадиган Парламент сайловлари арафасида германиялик фойдаланувчилар учун фактларни текширишни бошлайди.

Германия фуқаролари шубҳали мақолаларни белгилаши мумкин бўлади, шундан кейин улар Correctiv портали муҳаррирларига текшириш учун юборилади. Агар янгилик сохта деб топилса, у тасмада кўринади, аммо қисқача изоҳга эга махсус белгига эга бўлади. Фойдаланувчилар бундай мақолалар билан бўлишмоқчи бўлса, улар огоҳлантирилади.

Нашр Facebook’нинг исми ошкор этилмаётган матбуот котибига таянмоқда, унинг таъкидлашича, компания Германия ОАВлари билан музокаралар олиб бормоқда.

2016 йил декабрида Германия адлия вазири Хайко Маас Facebook’ни қалбаки янгиликлардан пул ишлашда айблаган эди.