Сўнгги икки мавсумни Тошкентнинг «Обод» футбол клубида ўтказган Алишер Азизов Қирғизистоннинг «Дордой» клуби билан 1 йиллик келишувга эришди. Бу ҳақда хабар берган «Championat.asia» сайти «Дордой»нинг шароитлари «Обод»никидан яхшироқ ёки йўқ эканига, шунингдек, шартнома шартларига ойдинлик киритмаган.
Азизов «Обод» футбол клубининг Олий лигага қадам қўйишига ҳисса қўшди. Кейин эса шу жамоани Олий лигада олиб қолиш учун жонбозлик кўрсатди. Ҳужумчи бунга қадар «Пахтакор», «Бухоро», «Андижон», «Қизилқум» каби клублар шарафини ҳимоя қилганди.
Алишер Азизов мамлакат Олий лигасида илк бор 2010 йилги мавсум кўриниш берган бўлиб, «Пахтакор» сафида 16 та ўйин ўтказган ва 5 та гол урган. Бу унинг энг яхши натижаси ҳисобланади. У кейинги олти мавсумидан 4 тасида умуман гол ура олмаган. Яна 2 тасида мавсумни 1 тагина гол билан якунлаган.
Ўзбекистон 1-лигасида эса Алишер Азизовнинг омади келган ва тўпурарга айланган. Шу футболчи эндиликда «Дордой» клубига ёрдам беради. Қайд этиш керак, Аҳмад Убайдуллаев мураббийлик вақтида Азизов Ўзбекистон ёшлар ва олимпия терма жамоаларида тўп сурган. У 1990 йилда туғилган.
Маълумот учун, Алишер Азизов билан шартнома имзолаган Бишкекнинг «Дордой» клуби 2016 йилги мавсумни Қирғизистон чемпионатида «Алай Ош»дан кейин 2-ўринда якулаганди.
Изоҳ (0)